Ақтау №1 орта мектебінде биология пәні мұғалімінің жұмыстан босатылуы резонанс жағдайға ұласты. Енді жоғары сынып оқушылары мұғалімді жақтап шықты. Олар ел президенті Қасымжомарт Тоқаевқа оқу орнында тексеру жүргізуді сұрап, бейнеөтініш жазды, деп хабарлайды Ulysmedia.kz.
Жақында қазнетте Ақтау қаласындағы №1 орта мектебінің оқушыларының Қазақстан президенті мен оқу-ағарту министрлігінің басшылығына жұмыстан босатылған биология мұғалімі Наталья Дроздованы лауазымына қайтаруды талап еткен үндеуі жарияланған еді.
- Біз мектепте тексеру жүргізуді сұраймыз. Біз мұғалім мен ата-аналарды қолдау мақсатында сөйлеп тұрмыз. Мектеп әкімшілігінің ең жақсы мұғалімінің бірі қаншалықты заңды түрде жұмыстан шығарылғанын түсіндіргенін қалаймыз. Біз жұмыстан босатылған мұғалім Наталья Викторовна Дроздованы қайтаруды сұраймыз, - деді жоғары сынып оқушылары.
Бейнехабарламаға оқушылардың ата-аналары да қосылды. Олар оқу орнының басшылығы осындай құнды педагогикалық кадрларды жұмыстан шығарып жатыр деп қапаланады.
– Біз №1 орта мектеп оқушыларының ата-аналарымыз. Сізден осы мектеп әкімшілігін тексеруді сұраймыз. Мектеп әкімшілігінің барлық заңсыз әрекеттеріне наразымыз. Оның түпкі мақсаты мектептің білім беру процесін бұзу, жоғары кәсіби педагогикалық құрамды тарату және біздің мектепті басқа мектептер арасында ең төменгі рейтингке құлдырату сияқты көрінеді, - дейді ата-аналар.
Еске сала кетейік, Ақтауда бұған дейін №1 мектептің биология пәні мұғалімі Наталья Дроздова жұмыстан шығарылған болатын. Ата-аналардың наразылығына байланысты бұл жағдай шуға айналып, қалалық білім бөлімінде жұмыстан шығару туралы бұйрықтың күші жойылды деп хабарланған. Бірақ мәселенің шешілмегені белгілі болды. Жұмысына барған мұғалімді мектеп басшылығы кері қайтарған.
Осы жағдайдан кейін Ақтаудағы басқа да мұғалімдер әділетсіз жұмыстан шығарылғанын айтып, наразылығын білдіріп жатыр.
