"Самұрық-Энерго" компаниясының басшысы ауысты. Компанияны бұған дейін инвестициялық жобаларға жауапты болған Аңсар Айдаров басқарады. Бұл тағайындау Қайрат Мақсұтов қызметінен босатылғаннан кейін жүзеге асты. Ол электр станциялары құрылысының мерзімін созғаны үшін сынға ұшыраған еді, деп хабарлайды Ulysmedia.kz.
Жаңа басшыға нақты міндеттер жүктелді
«Самұрық-Қазына» қоры басқармасының төрағасы Нұрлан Жақыпов Аңсар Айдаровты ұжымға таныстырды. Кездесуде ол энергетикалық нысандар құрылысының бұдан әрі созылуына жол бермеуді талап етті.
– Жиында негізгі инвестициялық жобаларды іске асыру мерзімдерін қатаң сақтау қажеттігі айтылып, электр станцияларын уақытылы пайдалануға беруді қамтамасыз ету тапсырылды, – деп хабарлады қордан.
Айдаров 2013 жылдан бері «Самұрық-Қазына» тобына қарасты компанияларда жұмыс істейді. Ол «Жетісу энергиясы» компаниясын, «Самұрық-Энерго» жобалық кеңсесін басқарған. Сондай-ақ инвестициялар жөніндегі бас директор қызметін атқарған.
Контекст
28 қазанда Қайрат Мақсұтов президент Қасым-Жомарт Тоқаевтың сынынан кейін қызметінен босатылды. Мемлекет басшысы электр энергиясының тапшылығы мен жаңа қуат көздерінің құрылысын созбалаңға салу мәселесін көтерген еді.
Келесі күні премьер-министр Олжас Бектенов Мақсұтовқа бірнеше рет ескерту жасалғанымен, жағдай өзгермегенін түсіндірді. Ескертулер Түркістан, Қызылорда және Екібастұз қалаларындағы электр станцияларының құрылысына қатысты болды.
