Бәрі неден басталды: Назарбаев пен Қожамжаров EXPO төңірегінде қандай шоу ұйымдастырды
28.03 16:29
Сұхбат
Атағы дардай ЭКСПО-2017 жобасы Назарбаевтың қолтаңбасы ретінде тарихта қалды. Біз бүгінге дейін аталған ауқымды жобаның даңқын ғана дабыралатқан екенбіз, ал дақпырты бізге беймәлім күйде көпшілік назарынан жасырылып, көлеңкеде қалған. Алты құрлықты аузына қаратқан ЭКСПО-2017 төңірегінде ақпараттық дүрбелең болғаны рас, оған себеп жобаға бағытталған мемлекет қазынасының талан-таражға түсуі еді. Айыптау органдары есебінде миллиардтаған қаржы түпсіз терең қалтаға түскені, оны сол кездің ең табысты менеджері саналған Талғат Ермегияевтың істегені жаһанға жар сала айтылды. Оған, алдымен, ғасыр құрылысы сеніп тапсырылды, ал кейінірек 14 жылға бас бостандығынан айырылды. Бюджет қаражатын аса ірі көлемде ысырап еткені және иемденгені үшін 20-дан астам адам сотталды. Солардың арасында «ЭКСПО-2017» ҰК» АҚ басқарма төрағасының бұрынғы орынбасары Мұрат Омаров та бар.
Ол 8 жылға бас бостандығынан айырылып, мүлкі тәркіленді және өмір бойы мемлекеттік әрі коммерциялық ұйымдарда жауапты қызмет атқару құқығынан айырылды. Ол жалпы режимдегі колонияда жазасын өтеп, бостандыққа шықты. Бұл жоба неге кейбір ұлттық компания қызметкерлері үшін қылмыстық іске, ақпараттық шабуыл мен сот үкіміне айналғанын түсіндіруді жөн көрген Мұрат Омаров осыдан 10 жыл бұрын болған оқиғаны Ulysmedia.kz бас редакторы Самал Ибраеваға берген сұқбатында баяндап берді. Ескерте кетейік, бұл бұрын айтылған ресми нұсқаға мүлдем ұқсамайды.