Еуропарламент депутаты Джузи Принчи маған сұхбат беретінін тек сол күні таңертең білді. Ол сұрақтарды алдын ала жіберуді өтінген жоқ. Баспасөз бостандығы туралы әңгіме өрбіткенде, журналистің ыңғайсыз сұрақтар қоюына мүмкіндік беру демократияның ажырамас бөлігі екенін айтты.
2024 жылы Еуропарламентке сайланған италиялық саясаткер Орталық Азия елдерімен байланыс жөніндегі делегацияны басқарады. Қазақстанға сапары кезінде онымен кездесіп, Еуропа мен Қазақстан арасындағы қарым-қатынаста адам құқықтары, тәуелсіз баспасөз және әйелдердің саясатқа шынайы араласуы қаншалықты маңызды екенін талқыладық.
Әңгіме барысында бұдан да ауқымды мәселелер қозғалды. Күрделі геосаяси жағдайда Қазақстанның көрші елдермен қарым-қатынасы, шетелдік инвесторлардың жауапкершілігі, Еуропамен экономикалық әріптестікті дамыту мен заң үстемдігі қағидатын сақтау арасындағы байланыс туралы сөйлестік.