Қаңтар оқиғасы бойынша прокуратура органдарына түскен шағымдар қалай қаралып жатыр? Бұл сауалға ҚР Бас прокурорының орынбасары Ерлік Кененбаев жауап берді, деп хабарлайды Ulysmedia.kz.
«12 қаңтарда Алматы прокуратурасы заңсыз қамауда отырған қаланың 24 тұрғынын босатты. Аталған факті бойынша арнайы прокурор тергеу жүргізуде. Прокурорлар уақытша ұстау изоляторларынан негізсіз ұсталған 96 адамды босатты. Сонымен бірге әрекеттерінің ауыр болмауына байланысты 92 адамды бұлтартпау шарасы өзгертілді. Ұсталған адамдарға қатысты құзыретті асырып пайдалану, өлім, азаптау фактілері бойынша істер тергеліп жатыр. Бұл сипаттағы 133 қылмыстық іс тергелуде. Барлық істердің обьективті өтуі үшін процессуалдық прокурорлар белгіленді. Ұсталған тұлғаларға медициналық көмек қамтамасыз етілді. Қазіргі таңда қамауда отырған және ұсталған 27 адамға қажетті медициналық көмек көрсетіліп отыр», – деді Бас прокурордың орынбасары Ерлік Кененбаев.
