Алексей Навальныйдың денесі анасы Людмила Ивановна Навальнаяға берілді. Бұл туралы Ulysmedia.kz порталы Алексей Навальныйдың баспасөз хатшысы Кира Ярмыш таратқан хабарламаға сілтеме жасап жазады.
– Алексейдің денесі анасына берілді. Бізбен бірге денені талап еткендердің барлығына көп рахмет. Әзірге Людмила Ивановна Салехардта. Жерлеу рәсімі әлі алда. Билік қоштасу рәсімін отбасы қалағандай өткізе ме, жоқ па, кедергі бола ма, жоқ па, білмейміз. Біз ақпарат келіп түскен кезде хабарлаймыз, - деп жазды Ярмыш.
Бұған дейін Навальныйдың жақтастары тергеуші Людмила Навальныйды ұлын жасырын жерлеуді талап етіп бопсалап жатқанын хабарлаған еді.
Тергеуші Алексей Навальныйдың анасына жасырын жерлеуге келісу үшін ультиматум қойды, деп хабарлаған жұма күні Кира Ярмыш.
– Алексейдің анасына тергеуші қоңырау шалып, ультиматум қойды. Үш сағат ішінде көпшілік алдында қоштаспай жасырын жерлеуге келіседі немесе Алексей колонияда жерленеді деген талап қойылған, — деп жазды ол жұмада жеделхатта.
Оның айтуынша, Алексей Навальныйдың анасы содан кейін тергеу комитетімен келіссөздер жүргізуден бас тартқан. Анасы Навальныйдың денесін екі күн ішінде денені беруге міндеттейтін заңды сақтауды талап еткен.
Навальныйдың өлімі
Ресейлік оппозиционер Алексей Навальный 16 ақпанда көз жұмған. Ресейдің Федералдық жазаны атқару қызметінің ресми хатында:
"Сотталған Навальный Алексей серуендегеннен кейін бірден есінен танып, өзін нашар сезінді.
Мекеменің медицина қызметкерлері дереу келіп, жедел медициналық жәрдем бригадасы шақырылды.
Барлық қажетті реанимациялық іс-шаралар өткізілді, олар оң нәтиже бермеді. Жедел медициналық көмек дәрігерлері сотталушының қайтыс болғанын айтты", – делінген.
Ресейлік оппозиционер Алексей Навальныйдың өліміне әлем елдерінің басшылары реакция білдірді.
Навальный туралы не білеміз?
47 жастағы ресейлік саясаткер Алексей Навальныйды сот «экстремизм» бабымен былтыр 19 жылға соттап жіберді. 2022 жылдың наурыз айында 9 жылға сотталған ресейлік оппозиционер онсыз да жазасын түрмеде өтеп жатқан. Жемқорлыққа қарсы күрес қорын құрып, зерттеу-тергеуімен танымал саясаткер жайлы не белгілі?
2010 жылдарға дейін кәсіпкер, журналист қызметімен танымал Навальныйдың аты сол жылдардан бері шыға бастаған.
Саясаткердің Ресей билігімен тіресіп, партия құрғысы келіп, оны тіркей алмай, әуре-сарсаңға түскен жылдары бар. Сайлауға да түсті. Навальный мен Сыбайлас жемқорлықпен күрес қоры «Ресей қоғамдық бастамасы» сайттарында ресейлік шенеуніктердің жемқорлығы жайлы біршама материал жариялады.
2011-2018 жылдар аралығында Навальный 10 рет әкімшілік қамауға алынған. Жалпы, осы уақыт ішінде абақтыда 192 күн болған. Deutsche Welle хабарлауынша, Навальныйдың темір тордың ар жағында өткізген уақыты 2017 жылы күрт өсіп, 2018 жылы 80 күнді құрады. Навальный 2011-2019 жылдар аралығында 474 күн қамауға алынды (оның 232-сі арнайы тергеу изоляторында, 242-сі үйқамақта).
Әйтсе де, Навальныйға Ресей президенті «Путинге тісі батпайды» деген сыны жиі айтылатын. Бұл сынды саясаткер бертін Путиннің сарайы жайлы түсірген зерттеуімен ысырды.
2020 жылы 20 тамызда Томскіден Мәскеуге қарай ұшқан Алексей Навальныйдың жағдайы ұшақта күрт нашарлап, ол есінен танып қалған. Алғашында Омбы ауруханасына жатқызылған саясаткер екі күннен кейін Германиядағы клиникаға ауыстырылды.
2021 жылдың 17 қаңтарында Навальный Германиядан Ресейге оралды. Федералды қылмыстық атқару қызметінің жедел департаментінің іздеу бөлімінің қызметкерлері Мәскеудің Шереметьево әуежайында оны бірден ұстады. Федералды қылмыстық атқару қызметі Навальныйдың Ив Роше ісі бойынша сынақ мерзімін бұзуына және оған іздеу жарияланғанына байланысты ұсталғанын, осыған байланысты Навальный сот бұлтартпау шарасы шыққанға дейін қамауға алынатынын мәлімдеді.
