Қазақстан Сауда және интеграция министрлігінің алаңында уақыт белдеуіне қатысты петицияны қарайтын жұмыс тобының бірінші отырысы өтті, деп хабарлайды Ulysmedia.kz порталы ведомствоға сілтеме жасап.
Мәселені кімдер қарады
Шенеуніктер бұған дейін уәде еткендей, Қазақстандағы бірыңғай уақыт белдеуіне қарсы петицияға 50 мың адам қол қойғаннан кейін жұмыс тобын құрылған еді. Оның құрамына Парламент депутаттары, петицияның бастамашы тобы, қоғамдық бірлестіктер мен сарапшылар қоғамдастығының өкілдері, денсаулық сақтау, энергетика, ауыл шаруашылығы, көлік, төтенше жағдайлар, еңбек және әлеуметтік қорғау, сауда және интеграция министрліктерінің және басқа да мемлекеттік органдардың өкілдері кірген.
Бастамашы топ өкілдерінің позициясы
Отырыста бастамашы топтың барлық өкілі сөз сөйлеген. Атап айтқанда, Алматы қоғамдық кеңесінің мүшесі Әсет Наурызбаев петициямен 50 мың дауыс жиналудың екі негізгі себебін атады:
«Біріншіден – бұл циркадтық ырғақтардың бұзылуы, біздің еліміз сияқты үлкен елде бір жалпы уақыт белдеуін адамдардың табиғи ырғағына жақындату мүмкін емес. Екіншіден – кешкі уақытта артық сағат жеке және заңды тұлғалардың шығындарына әкеледі. Табиғи циркадтық ырғақтарға жақындауымыз керек», – деп есептейді ол.
Медицина маманының пікірі
Алайда медицина ғылымдарының докторы, Л.Н. Гумилев атындағы ЕҰУ жалпы биология және геномика кафедрасының профессоры Бек Жетпісбаев, керісінше, осы жылдың наурыз айынан бастап қазақстандықтар табиғи уақытқа сәйкес өмір сүре бастағанын және қазір бейімделу процесі жүріп жатқанын жеткізген.
«Стресске бейімделудің өзіндік түрлері мен кезеңдері бар, оларды канадалық ғалым Ганс Селье анықтады. Бірінші кезең – мазасыздық кезеңі. Иә, біз физикалық фактордың ағзаға әсер етуіне тап болдық. Дегенмен, біздің биоритмдеріміз жаңа факторларға бейімделеді және биологиялық сағаттарымыз жұмыс істейді. Біз әртүрліміз және бейімделу процесі де әртүрлі жолдармен жүреді», - деді ЕҰУ жалпы биология және геномика кафедрасының профессоры.
Еңбек өнімділігі төмендеп кетті
Психолог және петиция авторы тарапының өкілі, Евгений Ян логистика мен көлікті жеңілдету, бизнеске ыңғайлылық және коммуникацияны жеңілдету сияқты бірыңғай уақыт белдеуіне көшудің артықшылықтарымен қатар, адамның биоритмдері бұзылды,еңбек өнімділігі төмендеді деп санайды. Ол ұсынған деректерге сәйкес күннің ерте шығуы мелатонин секрециясын тежейді және терең ұйқы фазасын тоқтатады, бұл болашақта ұйқының бұзылуына, кешке ұйқышылдыққа, психикалық бұзылулардың нашарлауына әкелуі мүмкін. Медициналық психолог халықтың денсаулығын жақсарту және әлеуметтік шиеленісті азайту үшін уақытты оңтайлы уақыт белдеулеріне ауыстыру орынды шешім болады деп есептейді.
Өз кезегінде, Ұлттық Ғылым Академиясының корреспондент-мүшесі, Әл-Фараби атындағы ҚазҰУ биофизика және биомедицина меңгерушісі және профессоры Сұлтан Тілеуханов, бүкіл аумақта бірыңғай уақытты қолданған Қытайды мысалға келтірді. Оның айтуынша, халықтың көпшілігі – студенттер де, ересектер де – сағат 22.00 шамасында жарықты сөндіріп, таңғы 6-да тұрады. Бұл тәжірибе бүкіл әлемде кеңінен қолданылады.
Жұмыс тобының бірінші отырысы сындарлы өтті, петиция авторы тарапының барлық өкілдері сөз сөйледі және екі тарап сарапшыларының дәлелдері тыңдалды. Талқылаудың барлық аспектілері бейнетүсірілім және аудиожазбада жазылған. Отырыста көтерілген мәселелер мен дәлелдер келесі отырыста талқылауды жалғастыру үшін мұқият зерделенеді.
