Қарағанды облысы Теміртау қаласында қашан көз жұмғаны белгісіз үш адамның мәйіті табылды, деп хабарлайды Ulysmedia.kz.
ОҚИҒА ЖАЙЛЫ
Облыстық Полиция департаментінің мәліметінше, үш адам – бір әйел және екі ер адамның өлімінен зорлық-зомбылық белгілері табылмаған.
«Вечерняя Караганда» газеті Telegram-арнасының жазуынша,Теміртау қаласы Уәлиханов көшесінің бойындағы үйде орналасқан пәтерден иттердің қыңсылаған дауыстары шыққан. Сондай-ақ пәтерден сасық иіс тараған. Марқұмдардың көршілері құтқарушыларды шақыруға мәжбүр болған.
Құтқарушылар есікті бұзып кіргенде алдарынан питбул иттер шыққан. Кинологтар иттерді ұстап алған соң, полиция ішке кіріп, үш адамның мәйітін тапқан, – деп жазады басылым.
ПОЛИЦИЯ МӘЛІМДЕМЕСІ
Бүгінде Полиция департаменті оқиғаға байланысты қылмыстық іс қозғаған.
Мәйіттерден зорлық-зомбылықтың белгілері табылған жоқ. Олардың өліміне қатысты қылмыстық іс қозғалды. Қазір өлімнің нақты себебін анықтау үшін тергеу жүріп жатыр, – деп хабарлады ПД.
