Премьер-министрдің орынбасары Серік Жұманғарин Ұлттық экономика министрлігін де басқаратын болды, деп хабарлайды Ulysmedia.kz.
Бұл туралы Ақорданың баспасөз қызметі хабарлады.
“Серік Мақашұлы Жұманғарин Қазақстан Республикасы Премьер-Министрінің орынбасары – Ұлттық экономика министрі болып тағайындалсын, ол бұрынғы атқарған лауазымынан босатылсын”, делінген Ақорданың ресми ақпаратында.
Оның кандидатурасын Мәжілістің тиісті комитеті мақұлдады.
Жұманғарин 2023 жылдың қыркүйегінен бастап Премьер-Министрдің орынбасары қызметін атқарып, сауда, ауыл шаруашылығы және т.б. мәселелерге жетекшілік етті.
2022-2023 жылдары Премьер-Министрдің орынбасары - Сауда және интеграция министрі, 2020-2022 жылдары Бәсекелестікті қорғау агенттігін басқарды. Бұған дейін ол Еуразиялық экономикалық алқаның мүшесі және ЕАЭО бәсекелестікті дамыту министрі болған.
Еске сала кетсек, бүгін Президент Премьер-Министрдің орынбасары – Ұлттық экономика министрі Нұрлан Байбазаровты қызметінен босатқан еді.
