Қазақстанда жыл басынан бері 44 бала терезеден құлады

Денсаулық сақтау министрлігінің хабарлауынша, күн жылыған сайын балалардың терезеден құлауына байланысты жазатайым оқиғалар қаупі айтарлықтай артады.

«Жазатайым оқиғалардың ең көп саны Атырау облысында – 13, Астана қаласында – 8 (оның ішінде 3 өлім жағдайы), сондай-ақ Маңғыстау облысында – 4 (оның ішінде 1 өлім жағдайы) тіркелген», – деп хабарлады министрлік.

Мамандар қайғылы оқиғалардың басым бөлігі ерте және мектепке дейінгі жастағы балалар арасында орын алатынын айтады. Жас ерекшеліктеріне байланысты олар қауіп-қатерді толық

бағалай алмайды. Ересектердің қысқа уақытқа болса да назар аудармауы орны толмас салдарға әкелуі мүмкін.

Жазатайым оқиғалардың негізгі себептері:

• балаларды қараусыз қалдыру;

• жауапкершілікті үлкен балаларға жүктеу;

• терезелерде қорғаныш құрылғыларының болмауы;

• терезе маңында баланың өздігінен шығуына мүмкіндік беретін жиһаздың орналасуы;

• москит торларын сенімді қорғаныс ретінде қате қабылдау.

Москит торлары ересектерге жалған қауіпсіздік сезімін тудыратынын ерекше атап өткен жөн. Олар тек жәндіктерден қорғануға арналған және баланың тіпті аз ғана салмағын да ұстап тұра алмайды, болмашы қысымның өзінде-ақ тормен бірге құлап кетуі мүмкін.

Қалай сақтанамыз?

Дәрігерлер осындай жағдайлардың алдын алу мақсатында ата-аналар мен заңды өкілдерге:

• балаларды, әсіресе ашық терезесі бар бөлмеде, қараусыз қалдырмау;
• арнайы қорғаныш құрылғыларын (ашылуын шектегіштер, блокираторлар, балалар құлыптары) орнату;
• терезе маңына жиһаз орналастырмау;
• баланы үнемі көзбен бақылауда ұстау;
• балаларға қауіпсіз мінез-құлық ережелерін түсіндіру;
• қауіпсіз желдету функциясы бар терезелерді пайдалану;
• терезе құрылымдарының және бекітпелерінің сенімділігін тексеруді ұсынды.