Венгрияда мемлекеттік M1 телеарнасы хабар таратуын уақытша тоқтатып, көрермендерден көп жыл бойы жалған ақпарат таратқаны үшін кешірім сұрады, деп хабарлайды Ulysmedia.kz.
Мән-жай
Тікелей эфир кезінде әдеттегі бағдарламалардың орнына қара экран шығып, онда қоғамдық ақпарат құралдарының өтірік айтуға құқығы жоқ екені жазылған. Алайда мәлімдемеде мұндай жағдайдың көп жыл бойы жалғасқаны айтылды.
Сондай-ақ, хабарламада мемлекеттік медиада реформа жүріп жатқаны көрсетілген. Оның мақсаты - бұл ақпарат құралдарын тәуелсіз әрі сенімге лайық ету. Өзгерістер аяқталғанға дейін жаңалықтар шығарылымы уақытша тоқтатылды.
Жаңалықтар эфирден алынды
Ақпаратқа сәйкес, M1 телеарнасы кешке қайта хабар тарата бастайды. Алайда әзірге ақпараттық бағдарламалар болмайды. Жаңалықтар жаңа редакция жасақталған соң эфирге біртіндеп қайтарылады.
Сонымен қатар, Hirado.hu жаңалықтар сайты да жұмысын тоқтатты. Материалдардың орнына қолданушылар телеарна эфиріндегімен бірдей хабарламаны көрген.
Өзгерістер мемлекеттік Kossuth радиосына да әсер етті. Бұған дейін онда бұрынғы премьер-министр Виктор Орбанның сұхбаттары тұрақты түрде беріліп келген. Қазір радиостанция тек музыка таратып жатыр.
Премьер-министр мұны тарихи оқиға деп атады
Венгрияның қазіргі премьер-министрі Петер Мадьяр болып жатқан жағдайды тарихи оқиға деп бағалады. Оның айтуынша, мемлекеттік медиа платформалар жылдар бойы халықты адастырған пропаганданы таратуды тоқтатты.
Хабар тарату қалпына келтіріледі
Мемлекеттік БАҚ жұмысын үйлестіретін MTVA компаниясы хабар тарату уақытша тоқтатылғанын мәлімдеді. Реформалар аяқталғаннан кейін телеарна жаңа форматта жұмысын жалғастырады, ал ақпараттық бағдарламалар эфирге біртіндеп қайта оралады.
