Ауыл шаруашылығы министрі Айдарбек Сапаров Премьер-министрдің орынбасары Серік Жұманғариннің Қазақстанда ауыл шаруашылығының дамымай отырғаны туралы пікірімен келіспеді, деп хабарлайды Ulysmedia.kz.
Үкіметте өткен брифингте журналистер Айдарбек Сапаровтан вице-премьердің Қазақстанда азық-түлік бағасының қымбаттауының себебі ауыл шаруашылығы дамымаған деген пікірімен келісесіз бе деп сұрады.
Менің ойымша, ауыл шаруашылығының әлсіздігі туралы айтудың қажеті жоқ. Жалпы, ауыл шаруашылығы өндірісі жұмыс істеп тұр. 90-жылдармен салыстырғанда көп нәрсе жасалды. Бірақ жақсартуға мүмкіндік бар, - деді Сапаров.
Ол ауыл шаруашылығын дамытудың басты мәселесі агротехнологиялардың сақталмауы, ауыл шаруашылығы дақылдарын әртараптандыру жұмыстары дер кезінде жүргізілмей жатқанын атап өтті.
Сондықтан да біз биыл жаңа тәсілдерді қолға алып жатырмыз. Әкімдіктерден сапалы тұқым талап етіп отырмыз. Соның арқасында ғана жақсы өнім алуға болады. Ол үшін «Аграрлық несие корпорациясына» 140 млрд, «Азық-түлік» корпорациясына 40 млрд, жергілікті бюджеттен 100 млрд теңге бөлінді. Бәрін орындасақ, нәтиже болады. Бірінші жылы болмаса, екінші жылы, - деп сендірді министр.
Сапаров сондай-ақ Ауыл шаруашылығы министрлігі Сауда министрлігімен бірге делдалдарды жою мәселесін пысықтап жатқанын атап өтті.
Бұған дейін Премьер-министрдің орынбасары Серік Жұманғарин Қазақстан ауыл шаруашылығы дамымағандықтан азық-түлік бағасының өсуі бойынша ЕАЭО көшбасшысына айналғанын айтқан болатын.
