Үкімет отырысында Ұлттық банк төрағасының орынбасары Берік Шолпанқұлов елдегі инфляция көрсеткіштерін жариялады, деп хабарлайды Ulysmedia.kz.
«Қазақстанда инфляцияның айлық динамикасы 2022 жылғы наурыз айындағы ең жоғары мәнге (3,7%) жеткен соң төмендеп келеді. Биылғы қаңтарда айлық инфляция біртіндеп 1,1%-ға дейін төмендеді. Бұған қарамастан, ол орташа жылдық мәннен едәуір асатын деңгейде қалып отыр. Жылдық мәнде инфляция биылғы қаңтарда 20,7%-ға жетті. Жылдық мәнде 25,7%-ға жеткен азық-түлік бағасының өсуі инфляцияның өсуіне көптеп үлес қосып отыр», – деді Шолпанқұлов.
Оның сөзінше, азық-түлікке жатпайтын инфляция да импорт тауарларының қымбаттауы мен оларға сұраныстың сақталуына байланысты 20,2%-ға дейін жеделдеді. Ақылы қызметтердің инфляциясы 14,2%-ға жетті.
«Логистиканың өзгеруіне, жоғары инфляциялық күтулерге, сұранысты фискалдық қолдауға және кредит берудің ұлғаюына байланысты инфляция өсуін жалғастырып келеді. Сақталып отырған тәуекелдер базалық мөлшерлемені ағымдағы деңгейде ұстап тұруды талап етеді», - деді Ұлттық банк төрағасының орынбасары.
Айта кетейік, өткен аптада Қазақстан әлеуметтік маңызы бар азық-түлік тауарлары 0,4%-ға, ал жылдық мәнде 23,5%-ға қымбаттағанын хабарлағанбыз.
Бұдан бұрын Үкімет басшысы Әлихан Смайылов қаржы бөлінгеніне қарамастан бағаны ұстап тұра алмаған шенділер қызметімен қоштасатынын ескерткен.
