Медиатренер, PR саласының сарапшысы Салтанат Әскербекқызы қазақтың тойы отбасылық құндылықтарды сақтауға көмектеседі деп санайды, деп хабарлайды Ulysmedia.kz.
ТОЙ
Бұл туралы Салтанат Әскербекқызы Facebook парақшасында жазды.
Қазақтың тойын сынайтындарды мен өзім айыптаймын. Бүгінгі күні әдемі дәстүрлермен өтетін тойлар – отбасы институтындағы байланысты сақтап тұрған жалғыз құрал десе де болады. Кем дегенде жылына бір рет немесе басқа бір мезгілде сен балалардың қалай өсіп келе жатқанын, жасы үлкендердің қалай өзгергенін көріп тұрасың. Сіздерде қалай екенін білмеймін, бірақ мен өзім туыстарыммен, алыс-жақын ағайынмен ерекше қуаныш пен жақындықты сезінемін. Бұл сәттер мені бақытқа бөлейді, бала кезіме қайта барып келгендей боламын. Егер біздің тойлар болмаса, бәріміз бір-бірімізден алыстап кетер едік… – дейді ол.
“Ал енді «тойды несиеге жасайды» дегенді айта бермеңіздерші, өтінем! Әр отбасы өз жағдайына қарай жасайды. Адамдарға қуаныш сыйлайтын дүниені ешкімнің де сынауға хақысы жоқ. Той – қаржылық себеппен артық немесе орынсыз деп есептелетін нәрсе емес” деп жазды Салтанат Әскербекқызы.
САЛЫҚ ТУРАЛЫ
Еске салайық, Қазақстанда аста-төк той жасағандар да салық төлеуі мүмкін екенін хабарлаған едік. Мемлекеттік кірістер комитеті енді асабаға, банкетке, тіпті тойбастарға кеткен ақшаны есептеуге кірісті. Егер шығын табысқа сай келмесе, салықшылар тексеріс жүргізуі мүмкін.
Көпшілік той жасау үшін несие алып, жылдар бойы жинаған ақшасын жұмсайды. Енді мемлекеттік кірістер комитеті сол шығындардың қайдан шыққанын жіті тексермек.