Актөбеде 51 жастағы марқұмның туыстары оны өздерінен жасырын түрде жерлегені үшін полиция департаменті және қаржы министрлігінен өтемақы талап етіп отыр, деп хабарлайды Ulysmedia.kz.
КТК телеарнасының мәліметінше, Аман Жақаевтың қазасын туған-туыстары ұзақ уақыт бойы білмей келген. Марқұмның денесі мәйітханада екі жарым ай бойы жатқан. Ал туыстары оны іздеуге кіріскенге дейін бір апта бұрын ер адамды "тұрғылықты жері жоқ адам" ретінде жерлеп тастаған. Оның қабіріне тек сандар жазылған белгі орнатылған.
Полиция өкілдері марқұмның екі танысымен бірге өзен жағасында ішімдік ішіп, суға батып кеткенін айтқан. Алайда тәртіп сақшылары неге оның туыстарын іздеуге тырыспағанын түсіндіре алмаған.
Енді қайтыс болған адамның анасы мен әпкесі полиция департаменті мен қаржы министрлігінен моральдық шығын ретінде 2 миллион теңгеден талап етіп отыр. Алайда екі ведомство да бұл талапты мойындамайды. Бүгін құқық қорғау органдарының заңгері мәлімдегендей, оқиғадан кейін Жақаевтың отбасына хабарласуға міндетті болған учаскелік инспектор мен жедел уәкіл қызметінен босатылған.
Іздемеді, хабарламады. 12 қыркүйекте өзім барып сұрастырдым, сол кезде олар маған оның 26 маусымда қайтыс болғанын айтты. Денесі екі жарым ай бойы мәйітханада жатқан. Не учаскелік, не тергеуші телефонды көтермейді. Оларға бәрібір сияқты. Менің ағамды адам деп есептемеді. Итше көме салған. Тіпті өкінбейді, – дейді марқұмның әпкесі Жанат Иманғалиева.
Айта кетейік, бұған дейін Семейде қаладағы мерекелік безендіру кезінде зардап шеккен мұғалімнің туыстары биліктен өтемақы талап еткен еді.