Астанада артефактілер контрабандасының жолы кесілді, деп хабарлайды ulysmedia.kz.
Қаржы мониторингі агенттігінің елордалық департаменті Ресей Федерациясының азаматына қатысты артефактілердің экономикалық контрабандасы фактісі бойынша тергеуді бастады, дейді қаржы мониторингі агенттігі.
Ресей азаматы Нұр-Сұлтан қаласының халықаралық әуежайы арқылы жалпы салмағы 2 мың кг-нан асатын мамонттардың азуы мен жүнді мүйізтұмсықтардың мүйізін Қытай Халық Республикасына контрабандалық жолмен әкетуге тырысты.
Тауарды жөнелтуші – Мәскеу қаласындағы ЖШҚ директоры. Палеонтологиялық материалдарды Қазақстан Республикасының аумағына әкелу және одан әрі ҚХР-ға жіберу мақсатында Нұр-Сұлтан қаласында ЖШС тіркеліп, директоры болып Ресей Федерациясының азаматы тағайындалған.
Мамандардың қорытындыларына сәйкес, мамонттар мен жүнді мүйізтұмсықтардың қазба қалдықтарының зерттелген барлық бөлігінің, бірегей палеонтологиялық артефактілердің ғылыми-тарихи, мәдени құндылығы бар. Зерттелген қазба қалдықтарының барлық бөлігінің құны 173 миллион теңгені құрайды.
Қолданыстағы заңнамаға сәйкес, мәдени құндылықтарды Қазақстан Республикасынан тыс жерлерге әкетуге тыйым салынады. Осылайша, ұсталған азамат аса ірі көлемде экономикалық контрабанда жасады деген күдікке ілінді. 2021 жылғы 1 қазанда күдікті ұсталып, сот санкциясымен қамауға алынды.