Жалпыға бірдей декларацияны ұсынбаған жеке тұлғаға алғашында ескерту беріледі. Тағы заңбұзушылық анықталса, 15 айлық есеп көрсеткіші көлемінде, яғни 55 380 теңге айыппұл салынады, деп хабарлайды Ulysmedia.kz.
Биылдан бастап елімізде жалпыға бірдей декларациялаудың үшінші кезеңі басталды.
Бұл жолы кәсіпкерлер, жауапкершілігі шектеулі серіктестік басшылары, заңды тұлғалар мен олардың жұбайына декларация тапсыру міндеттеледі. Олар елдегі және шет мемлекеттегі жылжымайтын мүлкін жария етуге тиіс.
Салық мамандары зергерлік бұйымдар, асыл тұқымды жануарлардың да жалпыға бірдей декларациялауға жататынын айтты. Декларацияны e-salyqazamat, "салық төлеуші кабинеті", "электрондық үкімет" мобильді қосымшалары арқылы тапсыруға болады. Жеке қағаз түрінде де, электронды түрде де 2024 жылдың 15 қыркүйегіне дейін тапсыруы қажет.
"Егер уақытында декларациясын көрсетпесе, біріншісінде айыппұл төленбейді. Одан босатылады. Бірақ қайталанған жағдайда 15 АЕК көлемінде айыппұл салынады. Декларацияны тапсыру кезінде жеке кабинеті бар салық төлеушінің және де e-salyqazamat қосымшасы арқылы тапсыруға болады. Және де поштамен немесе бізге келсе де болады. Біз бәрін егжей-тегжей түсіндіруге дайынбыз", - дейді салық маманы Айжан Албаева.
Айта кетейік, жалпыға бірдей декларациялаудың бірінші кезеңі 2021 жылы басталды. Екінші кезеңі 2023 жылы өтіп, оған дәрігерлер, мұғалімдер, мәдениет және спорт саласында жұмыс істейтін азаматтар мен мен олардың жұбайы кірді. Енді 2025 жылы қалған санаттағы азаматтар тапсырады.
Естеріңізге салсақ, бұған дейін мемлекеттік кірістер комитеті жалпыға бірдей декларацияға қалай дайындалу керектігін айтқан болатын.
