«Ұлттық ақпараттық технологиялар» АҚ басқарма төрағасы Ростислав Коняшкин қазақстандықтардың мобильді қосымшасындағы жеке куәліктегі қателік үшін кешірім сұрады, деп хабарлайды Ulysmedia.kz.
– 2024 жылғы 29 ақпаннан 1 наурызға қараған түні UTC +05.00 бірыңғай уақыт белдеуіне көшу жұмыстары жүргізілді. Біз «Ұлттық ақпараттық технологиялар» АҚ контурындағы 64 ақпараттық жүйе орналасқан 11 мыңнан астам виртуалды серверлер бойынша (eGov.kz порталы, egov mobile мобильді қосымшасы, e-license порталы, «Е-Нотариат» бірыңғай нотариаттық ақпараттық жүйесі, «Техникалық байқаудың бірыңғай ақпараттық жүйесі», «e-Otinish» электронды үндеу қызметі және т.б. ақпараттық жүйелер) жаңартулар жүргіздік. Мемлекеттік органдар өз құзыретіндегі ақпараттық жүйелер бойынша осындай жұмыстарды жүргізді, – дейді Ростислав Коняшкин
Оның хабарлауынша, жүйелер штаттық режимде жұмыс істейді. Мемлекеттік қызметтерді eGov.kz арқылы алу да әдеттегідей қолжетімді.
– «Цифрлық құжаттар» сервисінде деректердің дұрыс көрсетілмеуінің жеке жағдайлары анықталды. Қазіргі уақытта біз барлық қажетті жұмыстарды жүргізіп жатырмыз және ағымдағы деректер жақын арада қолжетімді болады. Қолайсыздықтар үшін кешірім сұраймыз», - дейді Ростислав Коняшкин.
Еске сала кетейік, бұған дейін қазақстандықтардың кейбірі ұялы телефонының мобильді қосымшасындағы жеке куәлігінде туған күнінің датасы өзгеріп кеткенін байқаған болатын.
