Израиль әскери-әуе күштері босқындар паналаған Газа секторындағы БҰҰ-ға қарасты мектептердің біріне соққы жасады. Алдын ала мәлімет бойынша, кемінде жеті адам қаза тапты, деп хабарлайды Ulysmedia.kz.
Палестиналық босқындарға арналған Таяу Шығыстағы көмек пен жұмысты ұйымдастыру агенттігімен байланысы бар мектепті палестиналықтар паналап жүрген болатын.
Палестинаның ресми ақпарат агенттігі WAFA-ның хабарлауынша, Таяу Шығыстағы палестиналық босқындарға көмек көрсету және жұмыстарды ұйымдастыру агенттігіне (UNRWA) қарасты Эсма мектебі Газа қаласының батысындағы Әл-Шати босқындар лагерін Израиль ұшағы бомбалаған.
Алдын ала мәлімет бойынша, Израиль шабуылы салдарынан жеті адам қаза тауып, өзге де жараланғандар бар.
2023 жылдың 7 қазанынан бері 42 500-ден астам палестиналық Израильдің Газа секторына жасаған шабуылдарының құрбаны болды, оның ішінде 17 000-ға жуық бала мен 11 378 әйел. Сонымен қатар тағы 99 546 адам жарақат алған.
Еске сала кетсек, жуырда Израильдің Палестинаға шабуыл бастағанына бір жыл толғанын жазғанбыз. Қақтығыс кесірінен 41 мың палестиналық қаза тапқан, оның көбі – бейбіт тұрғын.
Сондай-ақ Ливанда соңғы үш аптада 400 мыңнан астам бала үйлерін тастап кетуге мәжбүр болғанын хабарлағанбыз. БҰҰ-ның Балалар қоры (ЮНИСЕФ) бұл туралы мәлімдеп, соғыс елде "жоғалған ұрпақтың" пайда болу қаупін төндіріп отырғанын ескертті.
Ал Түркия президенті Ердоған Израильдің соғыс ауқымын одан әрі кеңейту ниеті бар екенін мәлімдеді.