«ҚазМұнайГаздың» бұрынғы басшысы Алик Айдарбаев Ресейдің мұнай алыбы – «Лукойл» компаниясында жоғары лауазымға тағайындалды, деп хабарлайды Ulysmedia.kz.
Айдарбаев енді «Лукойлдың» теңіз жобаларын басқара ма?
Newtimes.kz басылымының сенімді дереккөздеріне сүйенсек, Алик Айдарбаев «Лукойлдың» Қазақстандағы құрылымында жұмысқа кіріскен. Болжам бойынша, ол теңіз жобалары жөніндегі директордың орынбасары қызметін атқарады.
Алайда «Лукойл» компаниясының баспасөз қызметі бұл ақпаратқа ресми түсініктеме беруден бас тартты. PR-бөлім өкілі корпоративтік ережелерді алға тартып, пікір білдіруден бас тартты.
Алик Айдарбаев кім?
Айдарбаев мұнай-газ саласында және мемлекеттік қызметте мол тәжірибеге ие тұлға.
• 2011–2013 жж. – «ҚазМұнайГаз» Барлау Өндіру» АҚ бас директоры
• 2013–2017 жж. – Маңғыстау облысының әкімі
• 2017–2018 жж. – ҚР Инвестициялар және даму вице-министрі
• 2018–2022 жж. – «ҚазМұнайГаз» ұлттық компаниясының басқарма төрағасы
Айдарбаев Дубайдағы мүлік дауына да іліккен
Бұған дейін Алик Айдарбаевтың есімі журналистік зерттеулер аясында аталған. Халықаралық журналистер тобы жүргізген зерттеу нәтижесінде, Қазақстанның бұрынғы және қазіргі шенеуніктері мен олардың туыстарының Дубайдағы жылжымайтын мүліктерге ие екені әшкереленген. Айдарбаевтың да аты сол тізімде кездескен.