Соңғы үш жылда Қазақстанда ұлттық спорт түрлерін дамытуға мемлекеттік бюджеттен 13 миллиард теңгеге жуық қаржы бөлінген. Бұл туралы мəжіліс отырысында сөз сөйлеген туризм және спорт вице-министрі Серік Жарасбаев мәлімдеді, деп хабарлайды Ulysmedia.kz.
АҚША ҚАЙДА БӨЛІНЖІ
Серік Жарасбаевтың айтуынша, қаржыландыру мынадай көлемде жүргізілген:
2023 жылы ұлттық және ат спорты түрлерінің орталығына 2,28 млрд теңге бөлінді. Оның ішінде 1,5 млрд теңге – жергілікті бюджеттен, 780 млн теңге – республикалық бюджеттен бағытталған. 2024 жылы бұл сома 4,7 млрд теңгеге дейін артты. Оның 3,1 млрд теңгесі – жергілікті, ал 1,6 млрд теңгесі – республикалық бюджеттен берілген.
2025 жылы ұлттық спортқа 6 млрд теңге жұмсау жоспарланып отыр. Оның ішінде 4,8 млрд теңге – жергілікті, ал 1,2 млрд теңге – республикалық бюджет есебінен болады.
ҰЛТТЫҚ СПОРТ ТҮРЛЕРІ
Вице-министрдің айтуынша, қазіргі уақытта Қазақстанда 11 ұлттық спорт түрі ресми тіркелген:
Асық ату – дәлдік пен стратегия элементтері бар дәстүрлі балалар ойыны;
Аударыспақ – ат үстіндегі күрес, шабандоздар бір-бірін аттан түсіруге тырысады;
Бәйге – аттардың төзімділігін сынайтын ұзақ қашықтыққа жарыс;
Дəстүрлі садақ ату – қазақ стиліндегі садақпен ату;
Жамбы ату – ат үстінде шаба отырып нысана көздеу;
Жекпе-жек – қазақтың ұлттық жекпе-жегі, аралас жекпе-жекке ұқсас;
Көкпар – серкенің терісін тартысатын ат үстіндегі командалық ойын;
Қазақ күресі – дәстүрлі күрес түрі;
Қыранмен аң аулау – бүркіт және басқа да жыртқыш құстармен аңшылық жасау;
Теңге ілу – шауып келе жатып жерден теңге немесе шүберек ілу;
Тоғызқұмалақ – манкалаға ұқсас стратегиялық үстел ойыны.
ҰЛТТЫҚ СПОРТПЕН ҚАНША АДАМ АЙНАЛЫСАДЫ
Жарасбаевтың мәліметінше, 2024 жылдың қорытындысы бойынша ұлттық спорт түрлерімен тұрақты түрде айналысатындар саны 660 мың адамға жеткен. Бұл – дене шынықтыру және спортпен жүйелі айналысатын жалпы халықтың 9,6 пайызы.
Олармен 1700 штаттық жаттықтырушы жұмыс істейді, оның 1000-ы ауылдық жерлерде қызмет атқарып жүр.