Шымкент қаласында сыбайлас жемқорлық қаупі жоғары салаларда 33 заңбұзушылық анықталды. Бұл туралы сыбайлас жемқорлыққа қарсы қызмет хабарлады. Тексеру нәтижесінде спорт басқармасының 1995 жылы салынған ескі ғимаратты 3,6 миллиард теңгеге сатып алмақ болғаны белгілі болды, деп хабарлайды Ulysmedia.kz.
МӘН-ЖАЙ
Otyrar.kz мәліметінше, мамандардың айтуынша, бұл нысанның жағдайы талапқа сай емес және бағасы нарықтық құнынан бірнеше есе жоғары. Антикоррупциялық департаменттің араласуынан кейін бұл мәміле тоқтатылып, бюджет қаржысы кері қайтарылған.
Сыбайлас жемқорлыққа қарсы іс-қимыл департаментінің Шымкент қаласы бойынша басқарма басшысы Жандос Бекасанов бұл мәселеге қатысты пікір білдірді.
- Ғимаратты қашан және қандай жағдайда сатып алуға болатыны жөнінде нақты ережелердің болмауы — шенеуніктерге өз бетінше шешім қабылдауға мүмкіндік беріп отыр. Бұл жағдайда біздің ұсынымдардан соң келісімшарт күшін жойып, қаражатты бюджетке қайтарды, дейді ол.
ТАҒЫ БІРНЕШЕ ЗАҢБҰЗУШЫЛЫҚ АНЫҚТАЛДЫ
Тағы бір даулы жағдай №119 мектепке қажетті жабдықты сатып алуға қатысты болған. Биология кабинетін жабдықтауға бастапқыда 685 миллион теңге қарастырылған. Алайда тексеруден кейін бұл сома 100 есеге қысқартылып, небары 6,8 миллион теңгеге дейін төмендетілген.
Жандос Бекасановтың айтуынша, мұндай асырылып көрсетілген сома маманның техникалық қатесінен туындаған.
- Шындыққа жанаспайтын бұл жоспарды бекіткен шенеуніктер жауапқа тартылды, — дейді Бекасанов.