Атырауда үшінші күн қатарынан қою түтін сейілмей тұр: «Ақжайық» резерватында қамыс өртеніп жатыр, ал қалада өткір иіс пен ауада қауіпті деңгейдегі ластанғаня байқалады, деп хабарлайды Ulysmedia.kz порталы КТК телеарнасына сілтеме жасап.
Атырау тұрғындары үшінші күн қатарынан көкшіл қою түтін жағдайында өмір сүруге мәжбүр. Ауадан өткір, тұншықтырғыш иіс сезіледі, соның салдарынан адамдарда бас ауруы, тыныс алудың қиындауы сияқты белгілер байқалған. Қаланың кейбір тұрғындары тіпті сыртқа шығу үшін противогаз киюге мәжбүр.
Қалың түтіннің негізгі себебі – қаладан шамамен 15 шақырым қашықтықта орналасқан «Ақжайық» мемлекеттік табиғи резерваты аумағындағы ауқымды өрттер. Ресми мәлімет бойынша, от 800 гектардан астам жерді шарпыған. Алайда өртті толықтай ауыздықтау әзірге мүмкін болмай отыр, себебі өрт ошағы орналасқан аумақтар қол жетімсіз, батпақты және шалғай жерлерде орналасқан.
Резерват директоры Дәурен Есқабыловтың айтуынша, өрт ошақтары бір-бірінен 10–15 шақырым қашықтықта орналасқан, бұл өрт сөндіру жұмыстарын едәуір қиындатады. Қазір өрттің шығу себебі ретінде қасақана өртеу нұсқасы да қарастырылып жатыр. Егер бұл нұсқа расталса, кінәлілер қылмыстық жауапкершілікке тартылуы мүмкін.
Осы аралықта батпақты алқаптар мен шабындықтардан тараған түтін Атырау қаласын толықтай басып, халық денсаулығына қауіп төндіріп отыр. Әсіресе ауа сапасына қатысты деректер алаңдаушылық тудыруда: қаладағы өнеркәсіптік аймақтарда сутегі сульфиді (күкіртсутек) деңгейі қалыпты мөлшерден 11 есе жоғары болып тіркелген. Сарапшылардың айтуынша, ауа құрамының нақты көрсеткіштері зертханалық талдаулар аяқталғаннан кейін белгілі болады.