Алматы облысындағы «Қайрат» индустриялық аймағында орналасқан 177 гектар жер China State Construction Engineering Corporation (CSCEC) қытай құрылыс корпорациясының басқаруына берілді, деп хабарлайды Ulysmedia.kz.
ТОЛЫҒЫРАҚ
Бұл туралы Qazaq Invest Forum-2025 алаңында Ulysmedia.kz тілшісіне Алматы облысы әкімінің орынбасары Рустам Исатаев мәлімдеді. Оның айтуынша, аталған аумақта ондаған қытайлық кәсіпорын өндірісін іске қосып, CSCEC аясында жұмыс істемек.
– Биылғы ең үлкен жетістігіміздің бірі – әлемдегі ең ірі құрылыс компаниясы China Construction-ды тарту болды. Бұл – ауқымды конгломерат, құрамында көптеген жеке бюролары бар. Біз олардың алтыншы бюросының қатысуымен индустриялық аймақтан үлкен жер телімін толықтай басқаруға бердік. Олар «Қайрат» индустриялық аймағынан 177 гектар жерді алды. China Construction аясында 30-ға жуық компания өз жабдықтарын жинайтын өндіріс орындарын ашпақ, – деді Исатаев.
ӨНДІРІС АШЫЛАДЫ
Әкім орынбасарының айтуынша, бұл жобаға Geely автокөлік өндірушісі, лифтілер, электросамокаттар және өзге де техникаларды шығаратын компаниялар қызығушылық танытып отыр.
– Мұнда жинақтаушы өндірістер ашу жоспарланып отыр. Барлық компаниялардың жалпы инвестиция көлемі 1 миллиард долларға жетуі мүмкін. Бұл – өте ірі сома екенін түсінеміз. Біз компанияларға жауапты сапарлар жасадық. Олар China Construction сынды ірі ойыншының аясында бұл жобаға келуге дайын екенін білдірді, – деді Исатаев.
Оның айтуынша, Алматы облысының әкімдігі мен CSCEC индустриялық аймақ аумағына инженерлік инфрақұрылым жүргізу жұмыстарын бастап кеткен. Қытай корпорациясы өз қаржысы есебінен жол салып, канализация, электр және газ жүйелерін тартып жатыр.
АЙТА КЕТЕЙІК
China State Construction Engineering Corporation (CSCEC) – әлемдегі ең ірі құрылыс корпорациясы, 1957 жылы құрылған, Қытай үкіметінің бақылауында. Компания 100-ден астам елде ірі инфрақұрылымдық және өндірістік жобаларды жүзеге асырады – жол, көпір, электр станциясы, тұрғын және коммерциялық нысандар. CSCEC – әлемдегі ең ірі мердігерлердің бірі, акциялары Шанхай қор биржасында саудаланады, ал қызметкерлер саны жүздеген мың адам.