Сыбайлас жемқорлық істері: Қазақстанда 619 млн теңгенің мүлкіне тыйым салынды

МӘН-ЖАЙ

Ведомство мәліметінше, 2025 жылғы шілде айында Қазақстанда 17 құқықбұзушылық фактісі тіркелген. Олар ҚР Қылмыстық кодексінің келесі баптары бойынша сараланған:

• 362-бап – билікті немесе лауазымдық өкілеттіктерді асыра пайдалану – 3 дерек;
• 366-бап – пара алу – 5 дерек;
• 367-бап – пара беру – 4 дерек;
• 190-бап – алаяқтық – 2 дерек;
• 147-бап – жеке өмірге қолсұғылмаушылықты және дербес деректерді қорғау заңнамасын бұзу – 1 дерек;
•  361-бап – лауазымдық өкілеттіктерді теріс пайдалану – 1 дерек;
• 364-бап – кәсіпкерлік қызметке заңсыз араласу – 1 дерек.

СОТҚА ЖІБЕРІЛГЕН ІСТЕР

Барлығы 16 қылмыстық іс сотқа жолданды. Олар мына баптар бойынша:

• 189-бап – сеніп тапсырылған бөтен мүлікті иемдену немесе ысырап ету – 1 іс;
• 190-бап – алаяқтық – 6 іс;
• 206-бап – ақпаратты заңсыз жою немесе өзгерту – 1 іс;
•  218-бап – қылмыстық жолмен алынған ақшаны немесе мүлікті заңдастыру (жылыстату) – 1 іс;
• 361-бап – лауазымдық өкілеттіктерді теріс пайдалану – 1 іс;
• 366-бап – пара алу – 2 іс;
• 367-бап – пара беру – 3 іс;
• 433-бап – қылмыстық құқықбұзушылықты жасыру – 1 іс.

МҮЛІККЕ ТЫЙЫМ САЛУ

Қызмет өкілдерінің айтуынша, тергеуі аяқталған істер бойынша мемлекетке келтірілген 113,6 млн теңге залал өтелген, ал жалпы сомасы 619,1 млн теңгеге мүлікке тыйым салынған.

Сыбайлас жемқорлық туралы хабарлағаны үшін екі адамға 471,84 мың теңге көлемінде сыйақы берілген.