Алматыдағы Асхат Ахмедияров, Сәуле Сүлейменова бастаған бір топ суретшінің «Қанат біткен жер» көрмесі ашылды, деп хабарлайды Ulysmedia.kz.
«Aspan Gallery» галереясында суретшілер Рустам Хальфин, Молдақұл Нарымбетов, Саодат Исмаилов, Ұлан Жапаров, Асхат Ахмедияров, Бақыт Бубиканов және Сәуле Сүлейменованың туындылары қойылған «Қанат біткен жер» көрмесі ашылды.
Ұйымдастырушылар көрме арқылы табиғатқа назар аударып, өткен мәдени жадыға оралуға жол іздеуге тырыстық дейді.
Ulysmedia тілшісі суретші Асхат Ахмедияровпен сөйлесті. Ол көрмеге қойылған «Номад 4» экспозициясы ауылдан (даладан) қалаға үдере көшіп, қалада пәтер жағалап кетуге мәжбүр болған адамдар жайлы екенін айтты. Оның сөзінше, қазақ қоғамы уақыт өткен сайын далалық мінезінен ажырап барады.
«Мына фотоны негізінде 2012 жылы жасағанмын. Сол кезде бір оқиға болды. Астанада тұратынмын ол уақытта. Негізінен қазақ отбасылары тұратын жатақханадан тұрғындарды қолдарына тиындарын беріп, тұрып жатқан жатақханаларынан қуып жатқан. Сол кезде мен қоғам белсенділерімен бірге оларға араша түстім. Осы идея сол кезде келді. Қазақтың табиғатқа жақын мінездері жоғалып бара жатқанын көрсеткім келді. Қазір ешкім ауылда тұрғысы келмейді. Барлығы қалаға ұмтылады. Біздің даламыз, табиғатымыз, ішіміздегі табиғатымыз барлығы жоғалып барады», – дейді ол.
Асхат Ахмедияровтың «Номад 4» суретінде жазық даланы пәтер еткен адам бейнеленген.
Көрмеге жалпы саны жеті экспозиция қойылған. Олардың арасында суретші Сәуле Сүлейменованың «Жаңа өмір», «Далалық романтизм» туындылары бар. Суретші екі шығармасында да пластик пакеттерді қолданған.