Өзбекстанда үйлену тойлары, отбасылық мерекелер, ас беру рәсімдері мен басқа да салттық шараларды өткізуге қатаң бақылау енгізіледі. Бұдан былай тойға 200-ден астам қонақ шақыруға рұқсат жоқ, деп хабарлайды Ulysmedia.kz.
Everyday.uz мәліметінше, бұл тәртіп 2025 жылғы 16 қыркүйекте министрлер кабинеті бекіткен "Рационалды тұтыну" бағдарламасында көрсетілген.
Бағдарламаның мақсаты
Аталған бағдарлама — азық-түлік қауіпсіздігін қамтамасыз ету және ресурстарды ұтымды пайдалану жөніндегі мемлекеттік саясаттың бір бөлігі. Құжатта 2026–2030 жылдар "Азық-түлік қауіпсіздігінің өзекті кезеңі" деп жарияланған. Осы кезеңде мемлекет халықты жеткілікті әрі сапалы азық-түлікпен қамтамасыз ету, орынсыз шығындардың алдын алу және азаматтарда материалдық пен азық-түлік ресурстарына ұқыпты қарау мәдениетін қалыптастыру үшін кешенді шаралар қабылдамақ.
Артық шығындарға тыйым
Үкімет отбасылық салтанаттарды ұйымдастыру кезінде шектен тыс шығындар отбасыға ауыр қаржылық салмақ түсіретінін және азық-түлікті орынсыз пайдалануға әкелетінін атап өтті. Сондықтан бұдан былай үйлену тойы, ас беру, басқа да шараларды өткізу нақты нормаларға бағынады.
Бұрынғы құжаттағы нормалар
2019 жылдың қыркүйегінде Өзбекстанда үйлену тойлары мен отбасылық рәсімдерді реттеу туралы ереже қабылданған еді. Онда:
үйлену тойына, мерекелер мен ас беруге 200 адамнан артық шақыруға болмайды, алайда палау 250 адамға дейін таратылуы мүмкін;
"қосарланған тойда" қонақтар саны 250-ден аспауы тиіс, палау тарату 300 адамға дейін рұқсат етіледі деп көрсетілген.
Шоу мен артық салттарға шектеу
Қолданыстағы заңнамаға сәйкес, ұлттық дәстүрлер мен қоғамның моральдық қағидаларына қайшы келетін шоу-бағдарламалар мен іс-шараларды өткізуге тыйым салынған. Сондай-ақ негізгі рәсімдердің алдынан, кезінде немесе соңынан қосымша той-томалақ ұйымдастыруға болмайды.
Жеке тәртіппен жерлеу және ас беру рәсімдері де реттелген: орынсыз шығындарды қысқарту, артық күндер мен дәстүрлерден бас тарту көзделген.