ҰҚК сыбайлас жемқорлыққа қарсы қызметі Түркістан облысының жергілікті атқарушы органдарының бірқатар басшысының үстінен сотқа дейінгі тергеу жүргізіп жатыр, деп хабарлайды Ulysmedia.kz.
ТОЛЫҒЫРАҚ
ҰҚК мәліметінше, Қоғамдық даму басқармасының басшысы өз қоластында істейтіндермен сөз байласып, қызметкерлердің еңбекақысын төлеуге бөлінген 191 млн теңге бюджет қаражатын жымқырды деген күдікке ілінген.
Сондай-ақ Ветеринариялық қызмет басқармасының басшысы қаржы-шаруашылық қызметіне жүргізілген тексеру қорытындысы бойынша оң қорытынды алу үшін комиссия мүшелеріне 16 млн теңге көлемінде пара берген деген дерек те тергеліп жатыр.
Сот санкциясымен күдіктілер қамауға алынған.
Қылмыстық-процестік кодекстің 201-бабына сәйкес, өзге ақпарат жария етілмеді.
БҰҒАН ДЕЙІН
Еске салайық, Атырау облыстық құрылыс, сәулет және қала құрылысы басқармасы басшысының орынбасары Талғат Бисенді ҰҚК қызметкерлері әкімдік ғимаратында ұсталғанын хабарлаған едік.
Дереккөз мәліметінше, ол мердігер ұйым басшысынан пара алды деген күдікке ілініп отыр. Қазіргі уақытта ҚР ҚК-нің 367-бабы («Пара алу») бойынша қылмыстық іс қозғалды. Ал ақша берген ЖШС жетекшісі ҚР ҚК-нің 366-бабы («Пара беру») бойынша тергеліп жатыр.