Газа секторы денсаулық сақтау министрлігі Израиль шабуылдарының салдарынан қаза тапқандар саны 70 мыңнан асқанын мәлімдеді, деп хабарлайды Ulysmedia.kz Reuters агенттігіне сілтеме жасап.
МӘН-ЖАЙ
Ведомствоның мәліметінше, кейінгі екі күн ішінде тізімге тағы 301 адамның мәйіті қосылған. Осылайша, қаза тапқандар саны 70 100 адам болды. Кейінгі екі адам жақында жасалған соққылардан кейін опат болған, қалғаны қираған ғимараттардың астынан табылған.
Израиль бұл деректерге түсінік бермеді. Бұған дейін Израиль билігі Газа денсаулық сақтау министрлігінің статистикасына күмән келтіретінін айтқан, бірақ өздерінің нақты мәліметін ұсынбаған.
Медицина қызметкерлерінің айтуынша, сектордағы қираудың көлемі орасан зор болғандықтан, нақты ақпарат жинау қиынға соғып отыр. Соғыс басталғанда тек ауруханаларға жеткізілген мәйіттер тіркелген, кейін медициналық-құқықтық тексерулерден өткен мәліметтер қосыла бастаған. Осы себепті мыңдаған адамның өлімі ұзақ уақыт ресми түрде есепке алынбай келген.
КОНТЕКСТ
Израиль мен ХАМАС арасындағы бітім туралы келісім 10 қазанда күшіне енді. Палестиналық топ 2023 жылдан бері ұстап келген тірі қалған 20 тұтқынды босатты. Жауап ретінде Израиль шамамен 2 000 палестиналық тұтқынды, оның ішінде өмір бойына сотталғандарды да босатты.
ХАМАС сондай-ақ 26 қаза тапқан тұтқынның мәйітін қайтарды.