Қырғызстанда Жогорку Кенешке кезектен тыс сайлау өтіп жатқан тұста Ішкі істер министрлігі сайлаушыларды сатып алуға қатысты тоғыз қылмыстық іс қозғады. Бұл туралы ІІМ өкілі Сұлтан Макилов мәлімдеді, деп хабарлайды Ulysmedia.kz.
МӘН-ЖАЙ
Оның айтуынша, ІІМ мен Орталық сайлау комиссиясына барлығы 256 құқықбұзушылық туралы хабарлама түскен. Соның 59-ы үгіт науқаны басталмай тұрып тіркелген.
Ведомство мәліметінше, істердің бесеуі – Бішкекте, екеуі – Шу облысында, тағы екеуі – Жалал-Абад облысында қозғалған. Тергеушілер ақша, материалдар және өзге де айғақтарды тәркілеп, осы істер бойынша 12 адам жауапкершілікке тартылып жатыр.
КОНТЕКСТ
Бүгін Қырғызстанда азаматтар 30 көпмандатты округ бойынша Жогорку Кенеш депутаттарын сайлап жатыр. Әр округтен үш депутат сайланады, олардың қатарында міндетті түрде кемінде бір әйел болуға тиіс. Жалпы парламентке 90 депутат өтеді.
Дауыс беру қарсаңында елде бірнеше атышулы оқиға болды.
22 қарашада құқық қорғаушылар бұрынғы бірінші ханым Раиса Атамбаева тұратын пәтерде тінту жүргізіп, кейін оны ұлы Қадырбекпен бірге ІІМ Тергеу қызметіне алып кеткен. Сол күні саясаткер Темірлан Сұлтанбеков, оның анасы Қыял Токторбаева, Шайлообек Атазов, Сыймык Жапыкеев және Кубанычбек Кадыров та бөлімшеге жеткізілді.
Кейін Қырғызстан ІІМ сайлаудан кейін жаппай тәртіпсіздік ұйымдастыруға дайындалды деген күдікпен бір топ адамның ұсталғанын хабарлады. Ұсталғандардың қатарында елдің бұрынғы президенті Атамбаевтың ұлы да бар.