Қазақстандық Дастан Сәтпаев TransferRoom аналитикалық порталының мәліметі бойынша 21 жасқа дейінгі ең болашағы бар шабуылдаушылардың топ-10 тізіміне кірді, деп хабарлайды Ulysmedia.kz.
ТОЛЫҒЫРАҚ
Рейтингте 17 жастағы алматылық «Қайрат» футболшысы ондықта 10-орынды 88,5 балмен иеленді. Ол бұл тізімге енген Орталық Азия елдерінің жалғыз өкілі болды.
Рейтингте бірінші орында 18 жастағы грек футболшысы Харалампос Костулас («Брайтон») 91,3 балмен, екінші орында бразилиялық Витор Роке («Палмейрас») — 91,1, үшінші орында камерундық Кристиан Кофане («Байер Леверкузен») — 90,0 балмен тұр. Ондыққа сондай-ақ Франция, Бразилия, Испания, Норвегия және Грециядан шыққан жас шабуылдаушылар кірді, олар Еуропаның жетекші клубтарында өнер көрсетеді.
АНЫҚТАМА
Дастан Сәтпаев — алматылық «Қайрат» командасының шабуылдаушысы, 2007 жылы дүниеге келген. 17 жасында негізгі құрамға тұрақты тіркеліп, ағылшын «Челси» клубымен келісімшартқа қол қойды. Ол клубқа 2026 жылғы тамызда қосылады.