Гаага қаласында Украинаға соғыс салдарынан келтірілген шығынды бағалаумен айналысатын халықаралық орган құрылды, деп хабарлайды Ulysmedia.kz DW-ге сілтеме жасап.
ТОЛЫҒЫРАҚ
Комиссияны құру туралы келісімге 34 ел мен Еуропалық одақтың өкілдері қол қойған. Жаңа құрылым Еуропа кеңесінің аясында жұмыс істейді және штаб-пәтері Гаагада орналасады. Салтанатты рәсімге Еуропа елдерінің делегациялары, Украина президенті Владимир Зеленский және ЕО-ның сыртқы саясат жөніндегі жоғарғы өкілі Кая Каллас қатысты.
Комиссияның өзі өтемақы төлемейді. Оның негізгі міндеті – өтініштерді қабылдау және қарау, келтірілген шығынды бағалау, сондай-ақ мүмкін болатын өтемақы көлемін анықтау. Ал өтемақыға қажетті қаражаттың нақты қайдан алынатыны әзірге шешілген жоқ.
Еуропа кеңесінің бас хатшысы Ален Берсе комиссияның құрылуын соғыс үшін жауапкершілікке тарту жолындағы және мыңдаған зардап шеккендер үшін әділдікке қол жеткізудегі маңызды қадам деп атады. Ол елдерді комиссия жұмысы басталуы үшін конвенцияны мүмкіндігінше тезірек ратификациялауға шақырды.
КОНТЕКСТ
Бұл орган болашақ өтемақы механизмінің екінші бөлігі болмақ. Бұған дейін Шығындар реестрі құрылған еді, оған қазірдің өзінде 80 мыңнан астам өтініш түскен. Келесі кезеңде өтемақы қоры құрылуы тиіс.