Қазақстанда әлеуметтік желілерде заңсыз ұтыс ойындары мен лотереялар ұйымдастырған 100-ден астам адам ірі көлемде айыппұлға тартылды, деп хабарлайды Ulysmedia.kz.
ТОЛЫҒЫРАҚ
Спорт министрлігінің дерегінше, 2025 жылы Қазақстанда заңсыз лотерея ұйымдастырғаны үшін 121 адамға айыппұл салынған. Жалпы сомасы — 49,9 млн теңге. Министрлік көбіне әлеуметтік желілердегі заңсыз ұтыс ойындары мен түрлі акцияларға қатысты шара қолданған.
— Заңсыз ұтыс өткізгендерге хабарламалар жіберіліп, офлайн және онлайн форматта түсіндіру кездесулері өткізілді. Әлеуметтік желілерде ұтыс ұйымдастырған аккаунттардың тізімі министрліктің ресми сайтында жарияланды, — деп хабарлады ведомство.
Айыппұлды өз еркімен төлемегендерге қатысты сот процестері басталды.
ТІЗІМДЕ КІМДЕР БАР
Жазаланған блогерлер тізімінде танымал адамдар бар. Оның ішінде, блогер әрі кәсіпкер Дархан Жолшыбек 445-1-баптың 6 бөлігі бойынша жазаланып, 393 200 теңге айыппұл төлеген.
Блогер Нұртаза Нұрбек 445-1-баптың 6 бөлігімен жазаланып, 1 179 600 теңге айыппұл салынған. Әйелі Амина да жазаланып, 825 720 теңге айыппұл салынған.
Дәл осы соммадағы айыппұл “супер мамасита” лақап атымен белгілі Әлия Байтугаеваға салынған.
Блогер Қайсар Қамза 445-1-баптың 6 бөлігімен жазаланып, 1 179 600 теңге айыппұл арқалаған.
ЖАЗА
Туризм министрлігі Қазақстанда кең тараған әлеуметтік желідегі ұтыс ойындары заңсыз лотерея ұғымына кіретінін еске салды. Бұл — әкімшілік жауапкершілік көзделген құқықбұзушылық. Мұндай акцияларды ұйымдастырушылар үшін айыппұл мөлшері жеке тұлғаларға — 100 АЕК (2026 жылы 432,5 мың теңге), ал шағын бизнес субъектілеріне — 300 АЕК (1 млн 297,5 мың теңге) болуы мүмкін. Бір жыл ішінде қайта заң бұзса, айыппұл көлемі ұлғаяды: азаматтар үшін — 200 АЕК, шағын кәсіпкерлер үшін — 750 АЕК.