Астана соты блогер Әселина Батырдың кондитер Нұршат Ақбергеноваға қарсы ар-намысын, қадір-қасиетін және іскерлік беделін қорғау туралы берген талабын қанағаттандырмады, деп хабарлайды Ulysmedia.kz.
ТОЛЫҒЫРАҚ
6 қаңтарда Астана қаласының азаматтық істер жөніндегі ауданаралық сотында Әселина Батырдың кондитер Нұршат Ақбергеноваға қарсы ар-намысын, қадір-қасиетін және іскерлік беделін қорғау, әлеуметтік желілер мен бұқаралық ақпарат құралдарында таратылған ақпаратты шындыққа сәйкес келмейді деп тану, кибербуллингті тоқтату, моральдық зиянның орнын толтыруды өндіру, сондай-ақ авторлық құқықтар мен дербес деректерді қорғау туралы азаматтық іс қаралған.
СОТТА НЕ АНЫҚТАЛДЫ?
Сот тараптар арасында іс жүзінде шарттық қатынастар қалыптасқанын анықтады. Кондитер салтанатты іс-шараға арналған тортты дайындап, блогерге тапсырған, ал тортты алу және пайдалану фактісі талапкер тарапынан даулауға алынбаған. Торттың түпкілікті құны тараптармен алдын ала келісілмеген.
Туындаған дау нәтижесінде кондитер әлеуметтік желілерде ақпарат орналастырған. Кейіннен үшінші тұлғалар тарапынан бейнематериалдар жасалып, олар жауапкердің парақшасында қайта жарияланған (репост жасалған).
Сот талқылауы барысында аталған бейнематериалдардың үшінші тұлғалармен дайындалғаны және олардың авторлары сол тұлғалар екені анықталды. Жауапкер даулы бейнематериалдардың авторы болып табылмайды.
САРАПТАМА
Блогер сот сараптамасын жүргізуден бас тартқан. Сараптамалық қорытынды болмаған жағдайда, сот таратылған мәліметтердің ар-намыс пен қадір-қасиетке нұқсан келтіретін-келтірмейтінін, сондай-ақ олардың құқықтық табиғатын анықтау мүмкіндігінен айырылды.
Тауар белгісіне қатысты авторлық құқықтардың бұзылғаны жөніндегі дәлелдер сотпен расталмады, себебі белгіленімдер араласу дәрежесіне дейін ұқсастыққа ие емес. Дербес деректердің бұзылғаны фактісі де талапкер тарапынан дәлелденбеді.
СОТ ШЕШІМІ
Анықталған мән-жайларды ескере отырып, сот мәлімделген талап қою талаптарын қанағаттандырудан бас тарту туралы қорытындыға келді.
Сот шешімі заңды күшіне енген жоқ.