Украина АҚШ-тың өтініші бойынша Иорданиядағы дрон-ұстағыштар мен ұшқышсыз ұшу аппараттары бойынша сарапшылар тобын жіберген, деп хабарлайды Ulysmedia.
Мән-жай
Ресми Киев АҚШ-тың өтініші бойынша аймақтағы әскери базаларды қорғау үшін Иорданияға дрон-ұстағыштар (Дрон перехвачик) мен арнайы сарапшылар тобын жіберген. Бұл туралы Украина президенті Владимир Зеленский американың The New York Times газетіне берген сұхбатында айтты. Сұхбат бүгін, 9 наурызда жарияланған.
Зеленскийдің сөзінше, АҚШ көмек сұрап Киевке 5 наурызда жүгінген, ал украиналық топ келесі күні-ақ жолға шыққан.
«Біз дереу жауап бердік. Мен «Иә, әрине, мамандарымызды жібереміз» деп айттым», – дейді Зеленский басылымға берген сұхбатында.
Ақ үй әзірге бұл ақпаратты растамаған. The New York Times газеті сауал жолдаған. Бірақ әлі жауап алмаған.
8 наурызда Владимир Зеленский Telegram-арнасында Украина мамандары Иорданияға әлі жетпегенін, алайда жақын уақытта баруы тиіс екенін айтқан.
«Келесі аптада сарапшылар барған соң жағдайды қарап, көмектесуге кіріседі... Алғашқы кездесулердің нәтижесін күту керек», – деген ол жазбасында.
Контекст
Ақпанның соңында АҚШ пен Израиль Иранға қарсы әуе шабуылын бастағаннан кейін Таяу Шығыстағы жағдай ушыққан. Ресми Тегеран қарымта жауап ретінде аймақтағы АҚШ-тың әскери базалары мен Израильді зымыран және дронмен шабуылдаған.
Дрон-ұстағыштар — бұл басқа ұшқышсыз ұшу аппараттарын (дрондарды) анықтап, қуып жетіп, ұстап немесе жоюға арналған арнайы дрон.
Негізгі қызметі:
қарсылас дрондарын анықтау
оларды қуып жету
сигналын бұғаттау немесе соқтығысу арқылы жою
Қалай жұмыс істейді?
Дрон-ұстағыштар бірнеше тәсілмен әрекет етуі мүмкін:
Тор лақтыру – қарсы дронды торға түсіріп ұстайды.
Соқтығысу (kamikaze) – қарсы дронға әдейі соғылып, оны істен шығарады.
Электронды кедергі – басқару сигналын бұғаттайды.
Ракета немесе оқ-дәрі қолдануы мүмкін (кейбір әскери үлгілер).