Мемлекеттік айыптаушы Олжас Хайруллаев тергеумен жасалған мәміле қорытындысы бойынша Ерболат Жанәбілов пен Эльмира Төлегеноваға қандай жаза тағайындауды ұсынатынын мәлімдеді, деп хабарлайды Ulysmedia.kz.
ҚАНДАЙ ЖАЗА СҰРАЛДЫ?
Прокурор мәміле аясындағы жазаны атады: Жанәбіловке – шартты түрде екі жыл, ал жұбайына – дәл сондай мерзімге бас бостандығынан айыру сұралды.
Блогерлер келтірілген шығынды 247 млн теңгеден астам мөлшерде өтеп қойған.
«ҚК-нің 214-бабы 2-бөлігі 2-тармағы бойынша – мүлкін тәркілей отырып, 1 жыл 6 айға бас бостандығын шектеу. 218-баптың 2-бөлігі 1-тармағы бойынша, 55-баптың 4-бөлігін қолдана отырып – мүлкін тәркілей отырып, 2 жылға бас бостандығынан айыру. Қылмыстар жиынтығы бойынша түпкілікті жаза – мүлкін тәркілей отырып, 2 жыл бас бостандығынан айыру. Тағайындалған жазаны шартты деп есептеп, осы мерзім бойы пробациялық бақылау орнатуды сұраймын. Тұрғылықты жері мен жұмыс орнын ескертусіз өзгертпеу, рұқсатсыз өңірден шықпау, көңіл көтеру орындарына бармау, медициналық қажеттілік болмаса, психобелсенді заттарды қолданбау міндеттелсін, – деді прокурор.
Сондай-ақ Жанәбіловке жұмысы немесе оқуы болмаса, түнгі уақытта үйден шықпау, бір ай ішінде жұмыссыз ретінде тіркелу міндетін жүктеу сұралды.
«Ал Эльмира Төлегеноваға – кәмелетке толмаған балаларының болуына байланысты жазаны өтеуді кейінге қалдыра отырып, ең төменгі қауіпсіздік мекемесінде 2 жыл бас бостандығынан айыру жазасын тағайындау ұсынылады», – деді Олжас Хайруллаев.
СОТ ШЕШІМІ ҚАШАН ЖАРИЯЛАНАДЫ?
Айыпталушылар процессуалдық келісімге өз еркімен барғандарын растады.
Судья әрқайсысынан жеке-жеке нақтылап сұрады:
— Келісімді өз еркіңізбен жасадыңыз ба?
— Иә, өз еркіммен.
— Қолдайсыз ба?
— Қолдаймын.
Блогерлердің адвокаты да сотқа келтірілген шығынның өтелгенін растайтын түбіртекті ұсынды.
Сот шешімі сағат 16:30-да жарияланатыны хабарланды.
ҚЫЛМЫСТЫҚ ІС
Еске салайық, 2025 жылғы 15 қыркүйекте Астананың мамандандырылған ауданаралық соты ерлі-зайыпты Жанәбіловтерге қатысты әкімшілік істі қараған. Заңсыз лотерея өткізу дерегі бойынша іс тоқтап, қылмыстық құқықбұзушылық белгілеріне байланысты материалдар экономикалық тергеу департаментіне жолданған.
Қаржы мониторингі агенттігі мәліметінше, Instagram желісінде 15 миллионнан астам жазылушысы бар ерлі-зайыпты сенімге кіріп, заңсыз табыс тапқан.
Бұған дейін Төлегенова денсаулығының нашарлауына байланысты сот отырысына келе алмаған. Адвокаты сотқа медициналық анықтама ұсынды.
24 сәуірде сот алдындағы соңғы сөзінде Төлегенова көзіне жас алып, болған жайт үшін жауапкершілікті толық түсінетінін айтты. Сондай-ақ, процессуалдық келісім жасау жөнінде өтініш білдірді.
«Болған оқиғаға қатысты жауапкершілікті толық түсінеміз. Бұл біз үшін үлкен өмірлік сабақ болды. Заңды бұзғанымыз үшін шын жүректен өкінеміз. Бас бостандығымыздан айырмайтын жаза тағайындауды сұраймыз. Өз құқығымды пайдалана отырып, сот кеңесу бөлмесіне кеткенге дейін процессуалдық келісім жасау туралы өтініш білдіремін. Оның барлық шарттары мен салдары бізге түсіндірілді», – деді ол.
