Маңғыстау жағалауында Каспий теңізінің бетінде майлы дақ анықталды. Экологтар су сынамаларын алып, Аташ жағажайы маңындағы теңіз айдынында қандай зат пайда болғанын анықтап жатыр, деп хабарлайды Ulysmedia.kz.
Дақ жағалау маңынан байқалған
Майлы дақтың анықталғаны туралы ақпарат 8 тамызда түскен. Маңғыстау облысы бойынша экология департаментінің мамандары Аташ жағалауы мен оған іргелес Каспий теңізінің акваториясын тексерді.
Тексеру барысында экологтар теңіз суынан сынама алып, зертханалық талдауға жіберді. Әзірше мамандар дақтың пайда болу себебін атаған жоқ және оның мұнай өнімдерінің төгілуінен болғанын да растамады. Бұл сұраққа алынған сынамалардың зертханалық қорытындысынан жауап беріледі.
Сонымен қатар Аташ аумағында және теңіздің оған іргелес бөліктерінде мониторинг жұмыстары жалғасып жатыр.
Кемелерге талаптарды сақтау ескертілді
Оқиғаға байланысты экологиялық ведомство теңізде жұмыс істейтін кемелердің экипаждары мен айлақ иелеріне экологиялық талаптарды қатаң сақтап, мұнай өнімдерінің теңіз суына төгілуіне жол бермеу қажет екенін ескертті.
Жағдай Маңғыстау облысы бойынша экология департаментінің бақылауында. Зертханалық зерттеу нәтижелері қосымша хабарланатыны айтылды.