Қарағанды облысында дала өрттерімен күрес жалғасып жатыр. Бір тәулікте 1,3 мың гектардан астам аумақтағы тоғыз өрт ошағы сөндірілді. Тағы жеті өрт ошағында қызыл жалынмен күрес жүріп жатыр. Бұған дейін ауыл тұрғындары елді мекендердің біріне өрттің тым жақындағанын айтып, оны сөндіруге өздері шыққанын мәлімдеген еді, деп хабарлайды Ulysmedia.kz.
Төрт ауданда өрт болып жатыр
Қазір өрт Шет, Ақтоғай, Бұқар жырау және Қарқаралы аудандарында сөндіріліп жатыр. Құрғақ шөп пен бұталар, соның ішінде таулы-далалы жерлердегі өсімдіктер өртеніп жатыр.
Оқиға орнында Төтенше жағдайлар министрлігі мен жергілікті атқарушы органдардан 620 адам және 134 техника жұмыс істеп жатыр.
Құтқарушылардың айтуынша, ауа райы мен жер бедері өртті тез сөндіруге кедергі келтіріп жатыр. Өңірде күн ыстық, желдің екпіні қатты. Ал кейбір аумақтарға таулы жер бедеріне байланысты жету қиын.
Төтенше жағдайлар департаментінің мәліметінше, жедел штаб тәулік бойы жұмыс істеп тұр. Құтқарушылар өрттің таралуын бақылап, қажет учаскелерге қосымша күштерді бағыттауда.
Жаңатоғандағы жағдай қандай?
Кейінгі күндері Қарқаралы ауданындағы Жаңатоған ауылына ерекше назар аударылып отыр. 17 тамыз таңертең өрт аумағы әуеден бақыланды. Құтқарушылар жаңа ашық өрт ошақтарын анықтаған жоқ. ТЖД мәліметінше, қазір ауылға қауіп төніп тұрған жоқ.
Сонымен қатар өрт әлі толық сөндірілген жоқ. Бұған дейін ауыл тұрғындары Threads желісінде өрттің Жаңатоғанға жақындағанын айтып, жергілікті халықтың оны өз күшімен тоқтатуға тырысқанын жазған.
– Біздің ауылға көмек керек!!! Ауылда өрт өршіп жатыр. Қажетті дұрыс техника жоқ. Қарағанды облысы, Қарқаралы ауданы, Жаңатоған (Бейбітшілік) ауылы, – деп жазды ол.
Өрт кезінде екі адам зардап шекті. 1970 және 1989 жылы туған ер адамдар медициналық көмекке жүгінген. Бірінің денесінің 10 пайызы, екіншісінің 20 пайызы күйген. Екеуі де ауруханаға жатқызылды.
