13 жастағы Нұралы Әлхан Қарағанды облысындағы Семізбұғай көлінде суға батып кете жаздаған төрт жастағы баланы құтқарып қалды, деп хабарлайды Ulysmedia.kz.
Мән-жай
Тамыздың басында төрт жастағы бала үрлемелі матраспен суда жүрген. Қатты желден матрас аударылып, бүлдіршін суға құлап кеткен.
Сол маңда жүрген Нұралы баланың батып бара жатқанын көріп, бірден көмекке ұмтылған. Жасөспірім оны судан алып шыққан.
Оқушының айтуынша, сол сәтте ол қауіп туралы да, қандай да бір марапат жайлы да ойламаған.
«Менің бес бауырым бар. Сол сәтте әлгі баланың орнында өз бауырларымның бірі тұрғандай елестетті. Бар ойым баланы аман алып қалу болды», — деді Нұралы.
Оның ерлігі полицияға да жетті
Жасөспірімнің әрекеті әлеуметтік желіде кең тарады. Осыдан кейін Қарағанды облысы Полиция департаментінің бастығы Нығмет Исмағұлов Нұралы мен оның анасын кездесуге шақырған.
Нұралыға ІІМ нышаны бейнеленген қолсағат табысталып, бауырларына да сыйлықтар берілген. Ал анасы Самал Әбдірахмановаға алғыс хат тапсырылды.
Әйел бастапқыда ұлының баланы құтқару үшін суға түскенін естігенде қатты қорыққанын, кейін оның ісіне мақтанғанын айтты.
Нұралы көпбалалы отбасында тәрбиеленіп жатыр. Отбасында барлығы алты бала бар.