Қазақстан мен Түркия реадмиссия туралы келісімге қол қоюды жоспарлап отыр. Құжат көші-қон талаптарын бұзып жүрген адамдарды кері қабылдау және оларды транзитпен өткізу тәртібін айқындайды, деп хабарлайды Ulysmedia.kz.
Мән-жай
Келісім Қазақстан мен Түркия арасында көші-қон заңнамасын бұзып жүрген адамдарды қайтару ісін құқықтық тұрғыдан реттеуге мүмкіндік береді.
«Келісімге қол қою Қазақстан Республикасы мен Түркия Республикасы арасында ұлттық заңнама талаптарын бұза отырып, олардың аумағында жүрген адамдарды қабылдау және транзитпен өткізу саласындағы ынтымақтастықтың құқықтық негізін қалыптастырады. Сондай-ақ, бұл реттелетін салада өзара іс-қимыл тетігін құрып, заңсыз көші-қонмен күрестің тиімділігін арттыруға мүмкіндік береді. Жоба Қазақстан Республикасы мен Түркия Республикасының аумағында заңсыз жүрген адамдарды қабылдау және транзитпен өткізу тәртібін қарастырады», – делінген келісім жобасында.
Құжат жобасы қандай да бір әлеуметтік-экономикалық немесе құқықтық салдарға әкелмейтіні атап өтілген.
Еске салайық, бұған дейін Қазақстан мен Түркия арасындағы рұқсат етілген әуе рейстерінің саны аптасына 120-дан 224-ке дейін артатыны хабарланған еді. Тараптар жүк тасымалдайтын әуе қатынасын да кеңейтуге келіскен.