Венесуэла мен АҚШ 25 жылға есептелген ұзақ мерзімді энергетикалық жоба бойынша келісімге келді. Венесуэланың уақытша президенті Дельси Родригестің айтуынша, келісім мұнай өндіру көлемін тәулігіне кемінде 1,5 млн баррельге дейін арттыруды көздейді, деп хабарлайды Ulysmedia.kz.
Толығырақ
Родригес бұл келісімді тарихи деп атап, оның мұнай өнеркәсібін қалпына келтіруге және мемлекет кірісін арттыруға мүмкіндік беретінін мәлімдеді.
Оның айтуынша, жоба аясында 17 стратегиялық мұнай кен орнын игеру жоспарланған. Мұнай өндірудің мақсатты көлемі – тәулігіне 1,5 млн баррельден астам. Сонымен қатар ол бұл тек алғашқы кезең екенін атап өтті. Кейін тағы сегіз жаңа мұнай блогын игеру жоспарланып отыр.
Родригес Венесуэла табиғи ресурстарына меншік құқығын және оларға қатысты егемендігін сақтайтынын атап өтті. Сонымен бірге ел мұнай секторын қалпына келтіру үшін капитал, технология және тәжірибе тартуды көздеп отыр.
Венесуэла қанша табыс табуы мүмкін?
Родригестің бағалауынша, мұнай бағасы барреліне 65 доллар болған жағдайда, келісім мемлекетке шамамен 209 млрд доллар табыс әкелуі мүмкін. Ол сондай-ақ жоба аясында өндіріліп, сатылған әр баррель мұнайдан шамамен 19 доллар тікелей Венесуэлаға түсетінін мәлімдеді.
Қазір әлемдегі дәлелденген мұнай қоры бойынша бірінші орында тұрған Венесуэлада тәулігіне шамамен 1,25 млн баррель мұнай өндіріледі.
Трамп не деді?
Бұған дейін Дональд Трамп АҚШ Венесуэланың дәлелденген мұнай қорының шамамен бестен бір бөлігіне бақылау орнатуды көздейтінін мәлімдеген. Оның айтуынша, америкалық тарап жеке бизнес өкілдерімен серіктестік арқылы 65 млрд баррельден астам мұнайға бақылау алған.
Алайда Трамп жобаға нақты қандай кен орындары кіретінін, оған қандай компаниялар қатысатынын және америкалық бақылаудың заңды түрде қалай рәсімделетінін түсіндірмеді.