Қытай, Қазақстан және Ресей Ертіс өзені арқылы Арктикаға шығатын жаңа көлік бағытын құру мүмкіндігін талқылап жатыр. Идеяға сәйкес, өзенді Қытайдың батысынан Қазақстан мен Ресей арқылы Солтүстік Мұзды мұхитқа дейін жеткізетін ішкі жүк дәлізі ретінде пайдалану көзделіп отыр, деп хабарлайды Ulysmedia.kz.
Толығырақ
Бұл туралы South China Morning Post сарапшылар мен ресми тұлғаларға сілтеме жасап жазды.
Ертіс Қытайдың Шыңжаң-Ұйғыр автономиялық ауданынан бастау алады. Одан әрі өзен Қазақстанның Шығыс Қазақстан, Абай және Павлодар облыстары арқылы өтіп, Ресей аумағына кіреді де, Обь өзеніне құяды. Ал Обь өз кезегінде Солтүстік Мұзды мұхитқа шығады.
Осылайша, ықтимал бағыт Қытайды Қазақстан мен Ресей арқылы ішкі су жолдарымен Арктикамен байланыстыруы мүмкін. Ертістің жалпы ұзындығы – шамамен 4 248 шақырым. Оның шамамен 1 800 шақырымы Қазақстан аумағы арқылы өтеді.
Қытайға бұл не үшін керек?
Бейжің үшін мұндай бағыт Арктикаға шығудың тағы бір жолына айналып, теңіз бұғаздарына тәуелділікті азайтуы мүмкін.
Сарапшылардың айтуынша, дәстүрлі теңіз бағыттары Малай және Беринг бұғаздары сияқты тар өткелдер арқылы өтеді. Ірі қақтығыстар болған жағдайда олар блокада, санкциялар және күшейтілген бақылау үшін осал болуы ықтимал. Сондықтан Қытай жүк тасымалының балама бағыттарын белсенді түрде іздеп жатыр.
Арктикаға қызығушылық артып келеді
Солтүстік бағыттарға қызығушылық әлемнің әртүрлі аймақтарындағы соғыстар мен шиеленістерге байланысты арта түсті.
Шанхай халықаралық зерттеулер институтының аға ғылыми қызметкері Чжао Лунның айтуынша, Украинадағы соғыс пен Ормуз бұғазы маңындағы шиеленіс балама көлік бағыттарына деген қызығушылықты арттырып отыр.
Сонымен қатар климаттың жылынуы Солтүстік теңіз жолын кеме қатынасы үшін біртіндеп қолжетімді ете бастады. Бұған дейін жылдың көп бөлігінде қалың мұздың кесірінен бұл бағытта кемелердің жүруі шектелетін.
Алайда Ертіс арқылы жаңа көлік бағытын ашу әзірге тек ұсыныс деңгейінде. Жобаны жүзеге асыру үшін үш ел арасындағы саяси мәселелерді шешіп қана қоймай, табиғи жағдайлар мен инфрақұрылымға қатысты шектеулерді де ескеру қажет.