Алматы және Алматы облысының тұрғындары электр энергиясы үшін енді көбірек төлейді. Жаңа тарифтер 12 қыркүйектен бастап қолданысқа енгізіледі, деп хабарлайды Ulysmedia.kz.
Толығырақ
Қарапайым тұрмыстық тұтынушылар үшін электр энергиясының құны ҚҚС-ты қоса есептегенде 1 кВт/сағ үшін 37,92 теңге болады. Алайда нақты төлем отбасының қанша электр энергиясын тұтынатынына байланысты.
Жеке тұлғалар үшін тұтынудың үш деңгейі сақталады:
бірінші деңгей – 1 кВт/сағ үшін 34,28 теңге;
екінші деңгей – 45,51 теңге;
үшінші деңгей – 56,89 теңге.
Белгіленген көлемнен артық электр энергиясын тұтынған сайын әрбір келесі киловатт-сағаттың бағасы өсе түседі.
Тариф неге көтеріледі?
«Энергосбыт» компаниясы тарифтің өсуін электр энергиясын сатып алу құнының өскенімен түсіндірді. 15 шілдеден бастап электр энергиясын сатып алу бағасы 23%-ға өсіп, 1 кВт/сағ үшін 13 теңгеден 16 теңгеге дейін көтерілген.
12 қыркүйектен бастап электр энергиясын бөлшек саудада өткізудің шекті бағасы ҚҚС-ты қоса есептегенде 1 кВт/сағ үшін 45,59 теңге болады.
Электр энергиясын тұрмыстық емес мақсатта пайдаланатын тұтынушылар үшін тариф – 50,03 теңге.
Мемлекеттік мекемелер, мемлекеттік кәсіпорындар және мемлекет қатысатын бірқатар компаниялар үшін тариф 50,38 теңге болады.
Арнайы экономикалық және индустриялық аймақтардағы кәсіпорындар, әлеуметтік маңызы бар азық-түлік тауарларын өндірушілер және басқа да бірқатар ұйымдар үшін электр энергиясының бағасы 1 кВт/сағ үшін 45,59 теңге болып белгіленді.