2026 жылғы қарашада Қазақстанның барлық аумағында орташа айлық ауа температурасы нормадан 2 градусқа жоғары болады, деп хабарлайды Ulysmedia.kz.
Елдегі ауа райы
Елдің басым бөлігінде, соның ішінде оңтүстік-шығыстың таулы аудандарында орташа айлық температура 0-ден -5 градусқа дейін, оңтүстік және оңтүстік-батыс өңірлерде жылырақ болып, ауа температурасы +1…+9 градус аралығында болады.
Қазақстанның басым бөлігінде жауын-шашын мөлшері нормаға жуық болады. Солтүстік Қазақстан, Шығыс Қазақстан, Павлодар, Қостанай және Ақмола облыстарында, Батыс Қазақстан мен Ақтөбе облыстарының солтүстігінде жауын-шашын әдеттегіден көп түседі. Алматы облысы мен Жетісу облысының оңтүстік-шығысында, Абай облысының солтүстік-шығысы мен оңтүстік-шығысында да жауын-шашын мол болады деп болжанып отыр.
Әдетте қазаннан қарашаға қарай елдің басым бөлігінде ауа температурасы 7-10 градусқа, ал қиыр солтүстік-шығыста 12-14 градусқа төмендейді. Кей жылдары қарашада елдің солтүстігінде, орталығында және шығысында аяз -38…-49 градусқа дейін, ал қиыр шығыста -50 градусқа дейін жеткен.
Астана
Елордада орташа айлық температура -3,6 градус болады. Бұл нормадан 1,6 градусқа жоғары.
Айдың басында күн жылып, күндіз ауа температурасы +7…+12 градусқа дейін көтеріледі. Кейін түнде -4…-9 градусқа, күндіз 0…-5 градусқа дейін суытады. Алайда бірінші онкүндіктің соңына қарай қайтадан күн жылынады.
Екінші онкүндікте түнгі температура -7…-12 градусқа дейін төмендейді. Айдың соңында түнде -10…-15 градус, күндіз -3…-8 градус аяз болады.
Жауын-шашын мөлшері нормаға жуық, шамамен 29 мм болады. Айдың басында жаңбыр мен дымқыл қар жауады. Кейін қар жауып, боран соғады. Жекелеген күндері тұман түсіп, көктайғақ болады. Желдің екпіні секундына 15–20 метрге дейін жетеді.
Алматы
Алматыда орташа айлық температура +5,4 градус болады. Бұл нормадан 2,5 градусқа жоғары. Жауын-шашын мөлшері қалыпты деңгейден көп болады. Қалада оның айлық нормасы 55 мм.
Айдың басында күндіз ауа температурасы +18…+23 градусқа дейін көтеріліп, кейін салқындайды. Екінші онкүндіктің ортасында түнде -3…-8 градусқа, күндіз -3…+2 градусқа дейін суытады. Одан кейін күндіз қайтадан жылып, ауа температурасы +11…+16 градусқа жетеді.
Үшінші онкүндіктің басында тағы да күн суытады. Айдың соңында күндіз ауа температурасы +10…+15 градус болады.
Ай бойы жаңбыр мен қар жауып, тұман түсіп, көктайғақ болады. Желдің екпіні кей кездері секундына 15 метрге дейін күшейеді.
Шымкент
Шымкентте орташа айлық температура +8,7 градус болады. Бұл нормадан 2,6 градусқа жоғары. Жауын-шашын мөлшері қалыпты деңгейге жуық, шамамен 74 мм болады.
Қараша жылы басталып, күндіз ауа температурасы +17…+22 градусқа дейін көтеріледі. Кейін күн суытады. Екінші онкүндікте күндіз қайтадан жылып, ауа температурасы +12…+17 градусқа жетеді.
Үшінші онкүндікте түнде -3…+2 градусқа дейін үсік жүреді. Кейін ауа температурасы +15…+20 градусқа дейін көтеріледі. Айдың соңына қарай күндіз +5…+10 градусқа дейін салқындайды.
– Ай бойы жаңбыр жауып, кей жерлерде дымқыл қар түседі. Тұман түсіп, көктайғақ болады. Желдің екпіні кей кездері секундына 15 метрге дейін күшейеді, – деп хабарлады «Қазгидромет».