Қазақстанның Денсаулық сақтау министрлігі Алматыдағы «Аяжан» жеке клиникасын тексермек. Бұған медициналық анықтамалар мен санитариялық кітапшалардың заңсыз рәсімделуі мүмкін екені туралы ақпарат себеп болған, деп хабарлайды Ulysmedia.kz.
Жоспардан тыс тексеруге әлеуметтік желіде жарияланған ақпарат негіз болған. Жазбада аталған клиникада медициналық құжаттар талапқа сай рәсімделмеуі мүмкін екені айтылған.
Егер бұл ақпарат расталса, заң бұзғандарға тиісті шаралар қолданылады.
Денсаулық сақтау министрлігі медициналық анықтамалар, еңбекке уақытша жарамсыздық парақтары мен санитариялық кітапшалар тек қажет медициналық тексерулерден өткеннен кейін берілуге тиіс екенін еске салды.
Жалған құжат жасау және оны пайдалану үшін Қазақстан Республикасы Қылмыстық кодексінің 385-бабы бойынша қылмыстық жауапкершілік қарастырылған.
Бұл ретте заңсыз анықтама рәсімдегендер ғана емес, оның жалған екенін біле тұра сатып алған немесе пайдаланған азаматтар да жауапқа тартылуы мүмкін.
Елімізде жалған құжаттардың жолын кесу мақсатында медициналық құжаттарды электрон форматқа көшіру жұмыстары жалғасып жатыр.
2026 жылдың басынан бері Қазақстанда 13,7 миллионнан астам электрон медициналық құжат рәсімделген.
Оның шамамен 8,1 миллионы – медициналық анықтамалар мен еңбекке уақытша жарамсыздық парақтары.
Ал тағы 5,7 миллионға жуығы психиатриялық, наркологиялық және туберкулезге қатысты есепте тұрғаны немесе тұрмағаны туралы анықтамалар.