"Эксимбанк Қазақстан" Алматы облысының Қонаев қаласындағы Asia Gold казиносын тағы да сата алмады. Нысанның бастапқы бағасы 1,76 млрд теңге болғанымен, аукционға бірде-бір қатысушы тіркелмеген. Казиноны 2020 жылдан бері сатуға тырысып келеді, деп хабарлайды Ulysmedia.kz.
Мән-жайы
Аукционға Индустриялық көшесінде орналасқан, аумағы 5 122,5 шаршы метр болатын бес қабатты ғимарат қойылды. Оның ішінде казино, мейрамхана және қонақүй бар. Ғимарат 2014 жылы салынған.
Сонымен қатар жалпы аумағы жарты гектарға жуық екі жер учаскесі мен трансформатор қосалқы станциясы да сатылымға шығарылды.
Нысанның бастапқы бағасы 1 762 362 331 теңге болды. Аукционға қатысу үшін 264,4 млн теңге кепілдік жарна төлеу қажет еді.
Сауда бағасы жоғарылайтын аукцион форматында өтуге тиіс болған. Алайда аукцион басталғанда залда бірде-бір сатып алушы болмаған.
Казиноны банк неге сатып жатыр?
Казино бұрынғы иесінің қарызы үшін банкке өткен. Сатушы – 2018 жылдан бері таратылып жатқан «Эксимбанк Қазақстан» АҚ.
2018 жылғы тамызда Ұлттық банк жүйелі заңбұзушылықтар мен капиталды толықтырмағаны үшін «Эксимбанктің» лицензиясынан айырған. Сол жылдың қарашасында Алматы соты банкті тарату туралы шешім шығарған.
Еске салайық, банктің бұрынғы иесі Еркін Әмірхановқа 2020 жылдан бері іздеу жарияланған. Ол АҚШ-қа кеткен.
Тергеу мәліметінше, Әмірханов өз қалауынша 20-дан астам компанияға жалпы сомасы шамамен 100 млн доллар болатын қайтарылмайтын несие берген.
Контекст
Бұған дейін Қазақстанның Бас прокуратурасы Әмірхановты АҚШ-тан экстрадициялау процесін бастаған. Оған ақша жымқырды және талан-таражға салды деген айып тағылған.
Сол кезде тергеушілер банктен шамамен 33 млрд теңге жымқыру дерегіне қатысты тергеуді аяқтаған.
Ал Әмірханов сұхбаттарының бірінде ақшаны өзінің бұрынғы серіктесі Александр Клебанов елден шығарғанын айтқан.