Астана қалалық мәслихатының төрағасы Ерлан Қаналимов қоғамдық көлікте жүру ақысын көтеру мәселесіне қатысты пікір білдірді, деп хабарлайды Ulysmedia.kz.
«Бұл мәселе келесі жылы қаралатын шығар. 90 теңге көлеміндегі жол жүру құны қалада 9 жыл бойы сақталып келеді. Осы жылдары жанар-жағармай, бөлшектер, жабдықтар қымбаттағанына қарамастан қоғамдық көлікте жол жүру құны өзгерген жоқ. Дегенмен әзірге бұл мәселені қарастырмаймыз», - деді Ерлан Қаналимов.
Депутат нарықтағы жағдайға байланысты келесі жылы жол жүру ақысы қымбаттауы мүмкін екенін жоққа шығармады.
Айта кетейік, бүгіннен бастап Алматыда автобус жолақысы өсті. «Оңай» картасымен немесе QR-код арқылы төлем жасағанда жол жүру ақысы 100 теңгені құрайтын болады. Қолма-қол төлемде жол жүру құны – 150-ден 200 теңгеге дейін көтерілді.
Сондай-ақ, жуырда Петропавлда қоғамдық көлікте жол жүрудің жаңа тарифтері бекітілді.