Ақтау тұрғындары 19 қыркүйектен бері ыстық су берілмей жатқанына алаңдаушылық білдірді. Қала тұрғындары суық судың да қысымы азайып, суға түсу мүмкін болмай қалғанын жазуда, деп хабарлайды Ulysmedia.kz.
Маңғыстау облысы әкімінің Telegram-чатында қала тұрғындары күн сайын “Ыстық су қашан беріледі?” деген сұрақтар қояды. Су келгендердің кейбірі судың лас, жарамсыз екенін айтып шағымдануда.
«МАЭК» ЖШС өкілдері қалаға 19 қыркүйекте ыстық су беріле бастағанын, содан бері ешқандай шектеулер енгізілмегенін мәлімдеді. Алайда, гидравликалық сынақтар мен қаланың жылу желілерін жөндеуден кейін ақаулар мен құбырларды тазалау қажеттілігі анықталды, бұл ыстық су сапасының төмендеуіне алып келді.
«Каспий Жылу Су арнасы» Ақтаудағы барлық дерлік шағын аудандарда желдің екпіні салдарынан ақаулар барын растады. 1 қазанға дейін барлық ақаулар жойылып, қалаға ыстық су беріледі деп күтілуде.