Президент Қасым-Жомарт Тоқаев Қанат Бозымбаевты Қазақстан Республикасы премьер-министрінің орынбасары қызметіне қайта тағайындады. Тиісті жарлық 3 қыркүйекте жарияланды, деп хабарлайды Ulysmedia.kz.
Бозымбаев кім?
Қанат Бозымбаев 57 жаста. Ол Алматыда дүниеге келген, Қазақ мемлекеттік басқару академиясын тәмамдаған. Еңбек жолын 1993 жылы бастап, 1994 жылы Алматы қаласы әкімінің көмекшісі болды.
1990 жылдардың соңынан бастап мұнай-газ және энергетика салаларында қызмет атқарды. «ҚазТрансОйл» компаниясының вице-президенті, Энергетика министрлігінің Мұнай және газ департаментінің директоры, вице-министр болды. 2001-2007 жылдары KEGOC компаниясын басқарды, кейін «Самұрық» холдингіне жетекшілік етті. Бұл холдинг кейін «Самұрық-Қазына» болып қайта құрылды.
Бозымбаев 2009-2013 жылдары Жамбыл облысының, 2013-2016 жылдары Павлодар облысының әкімі болды. Кейін үш жыл Энергетика министрлігін басқарды. Президенттің көмекшісі және кеңесшісі қызметтерін атқарды. 2021-2022 жылдары қысқа уақыт Алматы облысының әкімі болды. 2024 жылғы наурызда премьер-министрдің орынбасары қызметіне тағайындалды.
Бозымбаев немен айналысады?
Бозымбаев ірі инфрақұрылымдық жобаларға жетекшілік етеді. Солардың ішіндегі ең маңыздысы – Алматы мен Қонаев қалаларының арасында бой көтеретін «болашақ қаласы» – Алатау City жобасы.
Вице-премьер жаңа қаланың бас жоспарын кемінде 10 жылда «қатыруға» уәде берді. Оның айтуынша, бұл әкімдердің ауысуына байланысты инвесторларға арналған талаптар мен ережелердің өзгермеуі үшін қажет.
Сонымен қатар Бозымбаев су тасқынына қарсы жұмыстарға да жауап береді. 2026 жылы осы мақсаттарға 49 млрд теңге бөлінді.