Палестинаның исламшыл ХАМАС ұйымы АҚШ президенті Джо Байден ұсынған Газа секторындағы атысты тоқтату жоспарына жауап берді, деп хабарлайды Ulysmedia.kz порталы reuters.com-ға сілтеме жасай отырып.
Хабарламада қозғалыс Байденнің ұсынысын оң бағалайды делінген.
– ХАМАС атысты тоқтату және Израиль күштерін Газа секторынан толық шығару, Газаны қалпына келтіру және қоныс аударушыларды тұрғылықты жеріне қайтару, сондай-ақ егер оккупация осындай келісімге адалдығын нақты жарияласа, осы тұтқындармен алмасу туралы келісімді орындау негізінде кез келген ұсынысты сындарлы және оң қарауға дайын екенін растайды, - делінген хабарламада.
Еске сала кетейік, 31 мамырда Байден Газа секторында атысты тоқтату жоспарын ұсынған еді. Ол үш сатылы қақтығысты азайту стратегиясын қамтиды, соның ішінде тұрақты бітімгершілік және Израиль әскерлерін Палестина территориясынан шығару ұсынысы бар. Байден бұл жоспар ХАМАС өкілдеріне катарлық делдалдар арқылы берілгенін хабарлады. Ол Хамасты бұл ұсынысты қабылдауға шақырды, Израиль өзінің қауіпсіздігінен қорықпай келісім жасай алатынын баса айтты.
24 мамырда Гаагадағы БҰҰ Халықаралық соты Израильден Рафахтағы әскери операцияны тоқтатуды талап етті. Сот Израиль Газа секторындағы Палестина халқының "толық немесе ішінара физикалық жойылуына" әкелуі мүмкін қалада "өзінің әскери шабуылын және басқа да әрекеттерін дереу тоқтатуы" керек деді. Алайда Израиль билігі БҰҰ сотының үкімі соғыс қимылдарына орын қалдырады деп санап, операцияны жалғастырды.
Соңғы үш аптада соғыс қимылдарына байланысты Газа секторының басқа бөліктеріндегі шайқастардан қашқан миллионға жуық палестиналық Газа секторының Египетпен шекарасында орналасқан Рафахтан кетті. БҰҰ Бас хатшысы Антонио Гутерриш Израильдің Рафахтағы операциясы гуманитарлық кошмар болуы мүмкін деп мәлімдеді.
Рафах – Газа секторының оңтүстігіндегі операция кезінде Израиль әскери күштері басып алмаған соңғы қала. Израиль билігі бірнеше ай бойы Хамас басшылығын толығымен жою үшін қажет деп санайтын Рафахта әскери операция жүргізуді талап еткен.